El portalgu del Güerna y l'autovía La Espina-Ponferrada exes de la reunión ente Areces y Zapatero

El portalgu del Güerna y l'autovía La Espina-Ponferrada exes de la reunión ente Areces y Zapatero

El presidente asturianu Vicente Álvarez Areces aseguro depués de reunise con José Luis Rodríguez Zapatero qu'a fines d'añu va sabese a cuanto llega la reducción de los portalgos de l'autovía del Güerna pa los usuarios distintos del tresporte pesáu, que yá tien una reducción del 30 por cientu. Tamién conseñó'l compromisu del gobiernu español pa la financiación de la polémica autovía ente La Espina y Ponferrada. Pela so parte'l diputáu d'IU-BA-LV, Aurelio Martín, calificó la primer anuncia de "brindis al sol".

D'esti mou Areces señaló que "el primer compromisu, qu'afecta al tresporte pesáu yá ta furrulando con una reducción del 30 por cientu y que'l segundu va afectar a otru tipu d'usuarios y, enantes de que termine esti añu yá concretaremos de forma definitiva lo que va figurar nos presupuestos del añu 2008". No que cinca a la reunión mantenida con Zapatero, Areces señaló que se trataron temes como les infraestructures, el turismu, los proyectos qu'hai en marcha y de los compromisos del Gobiernu d'España con Asturies. Asimesmo respecto al proyectu de La Espina-Ponferrada comentó que "vamos firmar un conveniu col Gobiernu d'España que nos va garantizar, al traviés de les aportaciones pluriañales, la financiación d'esti proyectu que dirá desnde la Espina a Ponferrada y que nos entamamos esti añu poniendo en marcha'l proyectu dende la Espina a Tinéu". El presidente esplicó a los medios que una vez rematáu'l tramu hasta Tinéu, va emprincipiar el tramu hasta Cangas y posteriormente, una vez solucionaos los problemes medioambientales, finalizalu en Lleón.

Pela so parte'l diputáu d'IU-BA-LV, Aurelio Martín, calificó esta anuncia de "brindis al sol" y que tolo que nun sía una "reducción significativa" cercana a la "supresión" del portalgu supondrá un "timu".