El Plenu del Conseyu Asesor de Política Llingüística va aconceyar cada seis meses

L'ALLA, la Universidá d'Uviéu, el RIDEA y la RTPA van tar representaos nesti órganu.

El BOPA de güei espublizó la composición que va tener el Conseyu Asesor de Política Llingüística, qu'echará a andar previsiblemente en setiembre. El Plenu, que "va aconceyar, polo menos, una vez cada seis meses", va tar presidíu pola conseyera, nesti casu Berta Piñán, mentes que la vicepresidencia ye pal direutor xeneral qu'ocupe Política Llingüística, anguaño Antón García.

Van tener representación fixa l'Academia de la Llingua Asturiana (ALLA), la Universidá d'Uviéu, el Real Instituto de Estudios Asturianos (RIDEA) y la Radiotelevisión del Principáu d'Asturies (RTPA), mentes que'l Plenu va completase con "hasta un máximu de trenta conseyeros y conseyeres por designación llibre de la conseyería competente en materia de política llingüística, escoyíos ente persones espertes de prestixu reconocíu". Va facer la función de secretariu "la persona titular del serviciu de Normalización del Usu de la Llingua Asturiana y Investigación, que va sustituyise en casu d’ausencia, vacante o enfermedá, pola persona titular del Serviciu de Planificación y Conocimientu de la llingua asturiana, o nel so casu, pola persona que se designe de la direición xeneral con competencia en materia de política llingüística".

La función del Conseyu Asesor va ser servir d'asesoramientu y apoyu del Gobiernu na toma de decisiones n’asuntos rellacionaos cola Política Llingüística del asturianu y gallego-asturiano. Los sos informes y propuestes nun tienen calter venceyante y los sos alcuerdos nun van tener efeutos direutos frente a terceros.

Na semeya, García y Piñán.