El petroleu allégase a los 50 dólares

Les cayíes de les últimes selmanes frenaron la selmana pasada, onde los pocos inversores que nun tan de vacaciones aprovecharon pa mercar a bonos precios. Los mercaos internacionales tuvieron una selmana con muncha volatilidá anque la renta variable tuvo una xuba perimportante.

El petroleu sigue tope tres tope y mui cerca de los 50 dólares, col mieu de los sos efectos sobre les economíes. Ensin dulda l'anuncia de la selmana foi la esperada salida a bolsa del conocíu buscador d'Internet Google.

Wall Street tuvo la meyor selmana nos últimos quince meses. El Dow Jones ganó un 2,9%, el Nasdaq un 4,6% y l'índiz S&P 500 un 3,15%. Los bonos precios de les acciones y el repunte técnicu d'un mercáu mui castigáu pola xuba del petroleu y les males estadístiques foron un emburrión pa la comunidá inversora. Nel Vieyu Continente nun pintó tan bien la selmana, y sólo Llondres tuvo xubes asemeyaes a les del otru llau del Atlánticu. Francfort y París tuvieron una selmana de más a menos pero con un pieslle positivo, con too y con ello.

Positiva selmana na Bolsa de Madrid con un Ibex-35 qu'aguantó nos 7.700 puntos y recuperando a lo llargo de la selmana un 1,7%. Asina l'índiz selectivu Ibex asitióse nos 7.707,10 puntos anque con un probetayu volume de negociu de 969 millones d'euros, la cifra más baxa nel añu nel parqué madrilanu. Con too y con ello foron los blue chips los que tuvieron les perdes más grandes, casu de Repsol, SCH, Mapfre, Acerinox y Arcelor. Nel terrén de les ganancies brillaron los valores Avanzit y Amadeus.

Tope del petroleu otra vegada.

La xuba llibre del preciu del petroleu nun tien frenu y ya cotiza mui cerca de los 50 dólares el barril. La cotización del barril West Texas algamó los 49,50 dólares mentanto que'l barril Brent mangose nos 44 dólares barril. Los especuladores nun se fartuquen y la crisis mundial ta bien cerca polo que los organismos económicos del BCE, la Reserva Federal o la Comisión Europea dan anuncia que los precios d'anguaño son insostenibles pa les economíes.

Cayida del dólar nel mercáu de divises asitiándose nos 1,2325 unidaes por euru.