El paru baxó nun 1,45 por cientu nel mes d'avientu

Asturies rexistró 1.422 paraos menos nel mes d'avientu, lo que supón una baxada del 1,45 por cientu con respeuto al mes anterior. El númberu total de desemplegaos asítiase en 96.634.

A nivel estatal, la cifra de paraos ye de 4.447.711 tres un descensu de 64.405 persones, lo que supón un 1,43 por cientu menos. El territoriu que vivió una mayor baxada según los datos del Serviciu Públicu d'Emplegu Estatal foi Melilla, con un descensu del 4,82 por cientu, siguíu de Madrid (-2,64 por cientu) y Andalucía (-2,41 por cientu). Por contra, onde más medraron los desemplegaos foi en Galicia (1,32 por cientu), La Rioja (0,64 por cientu) y Nafarroa (0,59 por cientu).

En términos añales, el paru n'Asturies baxó nun 4,21 por cientu, lo que supón 4.242 menos que nel 2013, cifra inferior a la media estatal, del 5,39 por cientu (253.627 menos). La comunidá con meyores datos nesti sen ye Cantabria, con una mengua del 11,42 por cientu, siguíu d'Illes Balears (-8,39 por cientu) y Aragón (-8,35 por cientu). Melilla, mentes, ye l'únicu territoriu onde medró'l paru nesti tiempu, en concreto un 4,01 por cientu.