El númberu 129 de ‘Lletres Asturianes’ ta disponible pa la so consulta na rede

El martes va presentase nel marcu de les XLI Xornaes Internacionales d’Estudiu qu’entama l’Academia de la Lllingua Asturiana (ALLA) el númberu 129 de ‘Lletres Asturianes’, el boletín de la institución, anque ésti yá ta disponible na rede pa la so consulta. Inclúi seis trabayos d’investigación amás de les sos seiciones habituales.

Na web de l’ALLA y en REUNIDO, la plataforma de revistes de la Universidá d’Uviéu, pue descargase la última entrega de la espublización semestral dirixida por Ana María Cano. Nesta ocasión agospia artículos qu'estudien aspeutos llingüísticos, lexicográficos, lliterarios, fonéticos y musicales, “contribuciones, de gran valir”, que “faen por enanchar el corpus de la publicación y de los estudios sobre la llingua y la lliteratura asturianes”.

Francisco José Rubiera, de la University of Central Florida, presenta’l trabayu ‘Porque no todos los ‘porque’ son iguales: La subordinación causal en asturiano’, y Carmen Muñiz Cachón l’entituláu ‘¿Son sordes dafechu les oclusives sordes intervocáliques n’asturianu?’. N’inglés participa Covadonga Lamar, de la University of California Riverside, con ‘MECA: an undergraduate short-term study abroad research project about Asturian language and Asturian emigration to America’.

‘Carauterístiques de la escritura de la canción tradicional asturiana’ ye’l tema que toca Héctor Braga, mentes que Xuan Xosé Lajo céntrase nos ‘Nuevos escritos de Krüger: más datos sobre la fala senabresa a entamos del sieglu XX’. Completa esta estaya de la revista ‘Trés cartes inédites ente’l Padre Galo y Pepín de Pría afayaes na investigación del Proyectu Fernán Coronas’, qu’escribe Adrián Martínez Expósito.

Reseña de ‘Nunca vencida’ por González Riaño

El númberu 129 de ‘Lliteratura Asturiana’ cuenta amás coles sos seiciones habituales. Siguiendo l’orde del exemplar, atopamos ‘D’otra miente’, onde Nicolás Bardio presenta l’artículu ‘Xuegos de rol: una ferramienta de democratización de la lliteratura en llingües minorizaes’.

En ‘Reseñes bibliográfiques’ atopamos dos, de Xosé Antón González Riaño, presidente de l’ALLA, faila de ‘Nunca vencida. Una historia de la idea d’Asturies’ (La Fabriquina) de David Guardado, y Marcos Martínez Fernández, de ‘The Asturian Language. Distinctiveness, Identity, and Officiality’ (Perter Lang) d’Avelino Corral. Mentes que la revista pieslla coles ‘Notes y anuncies’ de la institución y cola ‘Llibrería asturiana’.