El Nomenclátor de los Seres Vivos, nes XXXIX Xornaes Internacionales d'Estudiu de l'ALLA

|
Cláudia Martins nes XXXIX Xornaes Internacionales d’Estudiu recortada

Esti miércoles celébrase la segunda sesión d'esta actividá, nel que tamién tán programaes dos ponencies y trés comunicaciones.

Les XXXIX Xornaes Internacionales d'Estudios qu'entama l'Academia de la Llingua Asturiana (ALLA) siguen desenvolviéndose nel salón d'actos de la primer planta del edificiu d'Alministración de la Facultá de Filosofía y Lletres de la Universidá d'Uviéu. A les 16 hores Antonio Pamies, de la Universidad de Granada, va abrir el día cola ponencia ‘El principio de imbricación recurrente en la fraseología de las lenguas románicas', pa siguir coles trés comunicaciones previstes: ‘‘L’Appendix Probi’ como fonte de conocencia de les llingües romániques del noroccidente de la Península Ibérica’, d’Adrián Martínez Expósito: ‘(Re)descubriendo a la poeta Felisa la Santolaya (1924-2020)’; y ‘Asturianismos nos diccionarios de la Real Academia Española’, de Víctor Suárez.

A les 18 hores Llorián Cueto, del departamentu de la Sociedá Asturiana de les Ciencies Sabencia encargáu de la Zooloxía, va dar a conocer a los presentes el Nomenclátor de los Seres Vivos en Llingua Asturiana, ferramienta disponible na rede dende'l 2019 que recueye los nomes de los fungos, les plantes y los animales del país, amás de munchos exóticos, cola posibilidá de restolalos n’asturianu, castellanu o inglés y el nome científicu, amás de facilitar la busca pola categoría taxonómica (reinu, clas, orde, xéneru y familia). Va zarrar la tarde Aurelio González Ovies, de la Universidá d’Uviéu, cola la ponencia ‘El retornu a la infancia na poesía d’Asturies’, anque l'actividá va siguir mañana cola tercer y última sesión de les xornaes.

Na semeya, Cláudia Martins, de la Universidade de Aveiro, qu'ayeri lleó la ponencia ‘O capital tradutológico do mirandês’.

Contador Estadistiques