El Navia-Eo,a estudiu en El Franco

La Secretaría llingüística del Navia -Eo de l'Academia de la Llingua organiza en collaboración col Ayuntamiento de El Franco les "Segundas Sesióis d'Estudio del Occidente" que van celebrase los díes 1 y 2 d'abril.

Les conferencies d'estes segundes sesióis van tener llugar nel Salón de Sesióis del Conceyo del Franco, y nelles van intervenir espertos na llingua y cultura eonaviegues de los ámbitos más estremaos dientro d'un programa curtiu pero intensu. Asina, les xornaes emprimen el vienres a les 17:30 cola ponencia "Pasao y presente del galego-asturiano" a cargu d'Ignacio Vares, pa desarrollase darréu más cuestiones rellacionaes cola fala a cargu de Fany López Valledor y Mónica Loza que van esplicar la problemática del gallego-asturianu nes aules de secundaria y de Rafael Cascudo, que va esplicar xunta Xosé Miguel Suárez y Ignacio Vares les característiques del proyectu del "Diccionario Básico de Galego-Asturiano". La Ruta mitolóxica del Eo - Porcía y "Mitoloxía local y paisaxe a través d'un itinerario didáctico" van completar una tare na que tamién s'incluyen les conferencies "Os tempos d'onte en Santalla" a cargu de José Luis Díaz Álvarez y "Patrimonio llingüístico del Navia-Eo y marca territorial" por Fredo de Carbexe.

La xornada del sábadu estrémase en dos bloques de mañana y de tarde, incluyendo'l primeru ponencies de la profesora de la Universidá d'Uviéu Isabel Torrente sobre la historia del Navia-Eo, un allegamientu a la realidá llingüística eonaviega pol académicu de la llingua José Antonio Fernández Vior, y un estudiu sobre'l teatru en gallego-asturianu nel primer terciu del sieglu XX a cargu de Xosé Miguel Suárez, amás de les presentaciones d'Ignaciu Llope "Xogo d'identidaes nel Navia-Eo. Un achegamento crítico" "Os tópicos literarios na poesía en galego-asturiano d'agora mesmo" d'Aurora García y el "Vocabulario d'Entrambasauguas" de Xosé Lluis García Arias. La sesión de la tarde va contar coles participaciones d'Ana Cano con "Os sufixos con valor colectivo nel Navia-Eo". Más cuestiones sobre filoloxía eonaviega van tratales Ruth González (A sustantivación d'oraciois relativas en gallego-asturiano) y Mª Concepción Álvarez (Asomeñanzas engañosas entre el galego-asturiano y el español) mientres que la historia y la etnografía del Navia-Eo van correr a cargu de Servando Fernández que va falar sobre arquitectura indiana nel territoriu d'Entrambasauguas o Félix Martín que va tratar el tema de la música tapiega, ente otros. La entrada ye llibre a tolos actos.