El Muséu de Belles Artes quier inaugurar la so ampliación nel 2010

El presidente asturianu, Vicente Álvarez Areces, presidió ayeri la presentación de les obres d'ampliación del Muséu de Belles Artes. Na so intervención, el xefe del Executivu autonómicu manifestó que "esti ye'l tercer gran proyectu cultural que les alministraciones autonómica y central ponen en marcha n'Uviéu nos últimos dos años" y destacó que la capital del Principáu ye la ciudá "na qu'hai en marcha más inversiones de les que nunca hubo nel ámbitu cultural".

Les obres d'ampliación el Muséu de Belles Artes van duplicar el so tamañu actual, pasando de los 4.000 metros cuadrados actuales a un espaciu espositivu de más de 8.000 metros cuadraos que va permitir realizar una política d'esposiciones "muncho más ambiciosa. El Gobiernu asturianu tien previsto que los trabayos de demolición entamen enantes d'acabar el presente añu 2007, y concluyan en 2010. El presupuestu de los trabayos xube a 17,4 millones d'euros y la so execución lleva arreyáu un "llargu procesu previu de negociación pa les adquisiciones y espropiaciones de finques, procesu que supunxo un gastu adicional superior a los cinco millones d'euros".

Areces, que tuvo acompañáu de la conseyera de Cultura y Turismu, Encarnación Rodríguez, resaltó que tres la so ampliación, el Muséu de Belles Artes va ser un "muséu capital pa la ciudá y pa tol Principáu, con una colección de referencia internacional que, ensin duda, va siguir medrando".