El Muséu del Pueblu d’Asturies va acoyer una Esposición de la Mázcara Ibérica en branu del 2012

Nel aconceyamientu de la Rede Ibérica de la Mázcara, celebrada’l sábadu en Zamora, confirmóse que’l Muséu del Pueblu d’Asturies va acoyer una Esposición de la Mázcara Ibérica. Ésta va ser d’envergadura y va tener llugar en branu.
 
La esposición, que yá visitó Lisboa, Zamora y Porto, ta entamada pola Asociación para la Promoción, Desarrollo y Gestión de Turismo Ibérico (PRODESTUR) y llega a Asturies tres alcanzar un alcuerdu cola direición del Muséu del Pueblu d’Asturies gracies a la intermediación de l’Asociación pa la Recuperación de Los Sidros y Les Comedies ‘El Cencerru’, de Valdesoto. Cola so llegada al país, los asturianos y los munchos turistes que visiten les instalaciones museístiques del marxe derechu del ríu Piles van poder conocer a fondu les mazcares ibériques que tovía sobreviven en dellos pueblos de Asturies, Galicia, Portugal, Lleón, Castilla y Extremadura al traviés de semeyes, videos, traxes y los utensilios que lleven dalgunes d’estes mázcares.
 
Pese a que todavía nun tán zarraes les feches, yá se conoz que la esposición va abrir les sos puertes pa finales de mayu y que va tar a disposición del públicu hasta últimos de setiembre. Amás, alredor d’ella ta previsto la celebración d’actividaes nestos meses, como pue ser la visita de dalgún grupu de mazcaraos de fuera del país, actividaes folclóriques o dalgún otru tipu d’eventu rellacionáu coles mazcaraes tradicionales.
 
Xunto a la confirmación de la visita d’esta esposición basada nel Volumen II de Mázcara Ibérica, na reunión de la Rede celebrada’l sábadu nel Hotel AC Zamora, tamién se faló de la situación actual de la mesma, pendiente de la entrada de delles instituciones pa echar a andar de manera definitiva. Amás d’El Cencerru, la representación asturiana nel aconceyamientu tuvo formada polos otros dos grupos que viaxaron a Zamora a participar nel Festival de la Máscara Ibérica –Os reises de Tormaleo y Os reises del Valledor–; María Nachón, conceyala de Cultura del Conceyu de Siero; Nuria Rigueras, conceyala de Cultura del Conceyu d’Ibias; y l’historiador Ángel Mato.
 
Festival de la Máscara Ibérica
 
La participación asturiana nel Festival de la Máscara Ibérica esta fin de selmana en Zamora foi un ésitu total. Asina, la carpa asturiana de la Muestra de les Rexones asitiada na Plaza Mayor de la capital destacó por ser una de les más visitaes, y la sidra, ún de los productos más demandaos. Xunto a Asturies, tuvieron representación nesta amuesa Zamora, Mogadouro, Amarante, Beira Interior Sur (ADRACES), Aldeias do Xisto y l’Asociación de Artesanos de Serra de Estrela. Amás, la Plaza Mayor acoyó delles actuaciones musicales, ente elles les de Skama la Rede, banda que fixo baillar a tolos presentes el sábadu pela nueche.
 
Pero l’eventu más esperáu del festival foi’l III Desfile de la Máscara Ibérica, celebráu la mañana del sábadu peles cais de Zamora ante la mirada de miles de persones. Nella tomaron parte 350 persones de 20 grupos procedentes de tola Península Ibérica. Una bandera d’Asturies abrió’l pasu de Los Sidros y Les Comedies de Valdesoto, acompañaos por La Bandina del Grupu Principáu, de Llugones. Per delantre diben 4 sidros dando blincos apoyaos nunos palos d’ablanu, mentes que detrás diba la xente de Les Comedies interactuando col públicu y convidando a culetes de sidra. Tamién participaron nel desfile Os reises del Valledor y Os reises de Tormaleo, que dexaron bien altu el pabellón d’estos dos pueblos d'Ayande y Ibias, de manera respeutiva.