El médicu francés que nunca nun salió d'Asturies

La web "Asturias Republicana" que ta dando-y a conocer un públicu ampliu bien d'episodios de la cayida de la II República y los escuros díes de la posguerra civil n'Asturies, descubre esta selmana nuna nueva actualización la desconocía historia d'Armand André Thily, un médicu francés que, con venticinco años acabantes de cumplir, quedó presu de los franquistes na toma d'Asturies.

Militante del Partíu Comunista Francés, Thily taba al cargu de la Sanidá Militar del frente de Payares y trabayaba nel Hospital de Mieres como xefe médico de la 57 División del Exércitu del Norte. Ellí en Mieres foi onde lu prindaron militares de la lexón, que creyeron qu'atrapaben con elli a un importante dirixente de la internacional comunista. Tres d'un procesu sumarísimu, Thily morrió afusiláu a la puerta del Hospital Militar d'Uviéu, siendo la del doctor francés una execución exemplarizante que tenía l'oxetivu de mete-yos medrana en cuerpu a los sos compañeros de profesión. Nel web Asturias Republicana pue vese entera la historia del procesu al doctor francés.