El Macallan vien p'Asturies

El gaiteru asturianu Ángel Domingo ganó la edición 2.004 del Concursu Mac Crimmon de Gaita (antiguu Macallan), que se celebra nel contestu del Festival Intercélticu de Lorient (Bretaña- Francia). Esta competición acutada a gaiteros asturianos y gallegos -el concursu de gaita escocesa celébrase güei- representa cada añu una competición bien dura ente gaiteros d'una parte y otra de la ría del Eo na qu'anguaño triunfaron, con muncho, los asturianos, qu'amás de poner primeru a Ángel, contaron nel podium final con Iñaki Sánchez Santianes, que quedó terceru, mientres que la segunda plaza foi pal meyor de los representantes gallegos, Brais Paz. Como detalle, dicir que, por primer vegada, el tradicional Macalan abrióse a un tercer país celta cola participación, por primer vegada, d'ún gaiteru bretón, Emmanuel Frinn, completando el "aperturismu" del Macallan, nel que l'añu pasáu los gaiteros participantes yá teníen d'executar pieces bretones amás de les gallegues y asturianes, una dificultá añadía col envís de desfacer empates.

Según comentó a Asturies.com Diego Pangua, ganador del Macallan nel añu 2.000 y qu'esti añu tamién participa nel festival, el nivel en conxuntu de la representación asturiana nel nuevu Mac Crimmon 2004 foi muncho más altu que'l de la representación gallega, lo que se debe, al paecer del gaiteru de Felpeyu, a que Galicia nun aplicó peñera nin preselección nenguna de los gaiteros que diba mandar pal prestixosu certame bretón, mientres que pela parte asturiana, el certame "Remis Ovalle" funcionó mui bien esti añu pa esbillar una bona representación.

El que yá ye ganador del Macallan 2004, l'avilesín Ángel Domingo, foi alumnu de Tejedor y Xuacu Amieva, y yá nel 2.003 foi ún de los componentes de la representación asturiana, anque entós nun pudo firmar una actuación al altor de les sos posibilidaes.