El "lleonés" puede convertise n'asignatura optativa pal cursu 2008-09 nes escueles del sur del Cordal

Segun informa'l "Diario de León", l'equipu de gobiernu del conceyu de Lleón ta acabante de solicitar a les autoridaes educatives de la Junta castellano-lleonesa la inclusión de l'asignatura de "lleonés" pal cursu 2008-2009 con carácter voluntariu. Basándose na esperiencia de la enseñanza del mirandés como materia optativa en delles escueles de Miranda del Douru, l'equipu de gobiernu de la ciudá de Lleón (PSOE-UPL) al traviés del conceyal d'Educación y Cultura Lleonesa, Abel Pardo, pidió un "marcu específicu" pa la enseñanza de la nuesa llingua en Lleón.

El conceyal aseguró que l'equipu de gobiernu apuesta por un "procesu progresivu" d'implantación del "lleonés" como materia optativa, añadiendo que "en breve van presentase a les autoridaes educatives autonómiques los informes y estudios preparaos al respective". Pela so parte'l viceconseyeru d'Educación, Francisco Sánchez-Pascuala, dixo que "va estudiar" la cuestión, añadiendo que "tamos abiertos siempre a que los neños adquieran una mayor riqueza idiomática. Si se trata d'una bona propuesta y siempre que sía una asignatura estraescolar y optativa, podríemos llegar a un alcuerdu". Asimesmo recordó como la so conseyería tien un alcuerdu col Gobiernu gallegu pa impartir llingua gallega n'algunos centros escolares d'El Bierzo.