El llar de l’ALLA va acoyer un actu poéticu-musical pa presentar n’Uviéu ‘Aire, fuego y deseo’

|
Cartelu presentación 'Aire, fuego y deseo' n'Uviéu

Juan Carlos García Hoyuelos va desplazase a Uviéu pa participar nun actu poéticu-musical nel llar de l’Academia de la Llingua Asturiana (ALLA) que va servir de presentación n’Uviéu de ‘Aire, fuego y deseo’. Trátase del segundu proyeutu del autor en toles llingües ibériques.

Asoleyáu nel 2017, añu nel que tuvo llugar una presentación de la obra na xixonesa La Caja de Músicos –nel qu’Iniciativa pol Asturianu entregó-y’l títulu de 'Embaxador de la Llingua Asturiana'– con un recital de los autores que fixeron les tornes al asturianu, asina como de voluntarios que quixeron compartir col públicu los poemes del llibru, el visionáu d’estremaos videoclips y un conciertu de Toli Morilla, ‘Aire, fuego y deseo’ ye un llibru con 25 poemes acompañáu d’un CD con 33 pieces interpretaos por artistes o bandes na so llingua propia, como ye’l casu del cantautor asturianu, los lleoneses Tarna o la estremeña Manuela Elena. L’escritor burgalés nacíu en Basauri yá sorprendiera nel 2012 col so trabayu ‘Se lo dije a la noche’, que tamién recoyía toles llingües con raigañu na Península Ibérica.

El llunes 18 va tar n’Uviéu nun actu entamáu por Iniciativa pol Asturianu nel llar de l’ALLA, institución que tamién collaboró col proyeutu de García Hoyuelos. Nicolás Bartolomé Pérez (escritor lleonés miembru de l’ALLA y Faceira), Quique Díez Fernández (estudiante de filosofía), Roberto González-Quevedo (poeta y antropólogu lleonés, miembru de l'ALLA), Nel Morán (escritor), Fernán Morán (presidente de la Lliga Celta d’Asturies), Xuan Miyar (xubiláu y facedor pola llingua), Xosé I. Pidal Montes (poeta), Víctor Suárez (escritor) y Pablo Texón (poeta) van recitar pieces de ‘Aire, fuego y deseo’ nun eventu que va presentar el presidente del coleutivu que trabaya pola normalización del idioma en tolos ámbitos, Inaciu Galán.

Amás van proyeutase videoclips de cantares incluyíos nel CD y va ufrir un conciertu Toli Morilla, que interpreta’l poema ‘Magar la distancia’. La cita poética-musical va comenzar a les 18 hores.

Contador Estadistiques