El III Sidra&Blogues axuntó una representación amplia de la bloguesfera asturiana

‘Fueya en Blanco’, ‘González y González’ y ‘Conceyu Nacional de Liriu” foron los tres meyores blogues del 2010. La entrega de los premios tuvo llugar nel trescursu del III Sidra&Blogues, que reunió a blogueros y aficionaos en La Pola Siero. 
 
Anque dende la organización echóse de menos la presencia de más blogueros, consideren “mui positiva” la esperiencia del III Sidra&Blogues. “Averáronse munches persones que nun son autores de blogues pero que teníen interés poles charres y actividaes del eventu –tamién por reivindicación llingüística– y eso ye dalgo que nos presta muncho”, señala Tin Seoane, ún de los organizadores del eventu. L’actu principió a les 17 hores coles tres charres previstes –presentación del Firefox 4 por parte del coleutivu Softastur; ‘Un añu na rede de Ximielga.me’, de Mikel González; ‘Biblioteca virtual María Xosefa Xovellanos’, de Mar Martín–, pa depués dar pasu a la entrega de premios en tres categoríes. En meyor conteníu, el galardón foi pa ‘Fueya en Blanco’, mentes que ‘González y Gonzáles’ llevóse’l de meyor diseñu. Mentes, el premiu del públicu foi pa ‘Conceyu Nacional de Liriu’.
 
Los ganadores recibieron un bon númberu d’obsequios de los collaboradores del III Sidra&Blogues y los sos blogues yá llucen el banner que los identifica como los meyores del 2010. Pa finalizar la xornada, que s’allargó hasta la madrugada, celebróse una espicha nel Abre César “nun gran ambiente”.
 
La Xunta de Blogues en Llingua Asturiana yá ta pensando na edición próxima del Sidre&Blogues, que siguirá colla so ruta itinerante. “Vamos continuar col Sidra&Blogues cola intención de qu’en ediciones futures participen más blogueros, yá que son los protagonistes verdaderos d’esti eventu”, apunta Seoane, qu’anuncia como novedá posible “l’adquisición d’un dominiu pa facilitar les votaciones pal añu qu’entra”.  

Comparte...                                    

Enllaz permanente