El II Xuntoiro viaxa a El Franco pa siguir favoreciendo l’intercambiu cultural en gallego-asturiano

L’alcuentru alredor de la llingua eonaviega, con un enfoque asemeyáu al Reguerada Fest de Candás, va desenvolvese esta fin de selmana n’El Franco, sustituyendo asina a A Veiga como sede. Música, artes visuales, lliteratura, artes escéniques, espectáculos pa neñes y neños, un mercáu popular o bolo rodao son dalgunes de les actividaes del II Xuntoiro pa estos trés díes, entes les que rescampla la Riada Lliteraria.

La iniciativa puesta en marcha l’añu pasáu col oxetivu de “favorecer el intercambeo de distintos sectores culturales qu'usan a llingua da parte máis occidental d'Asturias” medra en xornaes y propuestes. Asina céntrase’l programa nuna mesma fin de selmana a diferencia de la primer edición, cuando se dividió en dos con un día dedicáu al públicu adultur y otru a la reciella.

La Escola Pública de Valdepares acoyó esti meudía l’actividá inaugural, una recoyida de la esposición ‘Nía’ y de los trabayos ‘As nosas nías’ sobre les muyeres de les families del colexu pa un montaxe posterior nel Complexo Cultural As Quinta, que va agospiar la mayor parte de la programación. Ehí, a les 20.30 hores, va entamase una mesa redonda sobre los últimos trabayos lliterarios en gallego-asturiano, que sirve de presentación de los mesmos, nel que va participar Marta Ledo, Carmen Siñeriz y Natalia Riego baxo la moderación de Miguel Rodríguez Monteavaro.

Mañana va entamase a les 10 hores un mural collaborativu con graffiti diseñáu y tutorizáu pol Colectivo Chinelas cola ayuda d’As Vacas Francas nel que pueden participar mayores de 8 años. El trabayu va allargase hasta les 13 y siguir de 16 a 18 hores, cola posibilidá d’incorporase a l’actividá en cualquier momentu.

Segunda Riada Lliteraria

N’El Porto, a les 12 hores, va repetise la Riada Lliteraria, una visita guiada y recital poéticu pel llugar cola presencia d’Eduard Velasco, María F. Abril, Conchita Álvarez Lebredo y Alejandro Fernández García. De tarde, n’As Quintas, va abrirse’l Mercao Eonaviego de 16 a 20 hores, con productos culturales y artesanales del occidente y l’animación de los gaiteros de la Escola Musical Asocación Cultural Arcángel San Miguel.

Va haber actividaes pa la reciella dende les 18 hores como’l teatru de solombres ‘A lenda dos indios sioux’, los títeres ‘El animal más forte da Ría del Eo’ y el teatru de papel ‘El principio del fin’ a partir d’un cuentu de Gonzalo Moure. Estos espectáculos de Jacinta Martínez “amostran el amor pola terra, a naturaleza, el respeto á diversidá y á pluralidá”.

A les 19.15 hores, yá nel Auditorio, va tener llugar la presentación del Proyecto Avareira entamáu dende la ferreiría del Mazonovo pa recuperar la fabricación del instrumentu tradicional trompa o birimbao y promover el so usu por parte de la mocedá. Participen Paz Prieto, Juan Carlos Quintana y Dani do Pando.

Va pesllar esta segunda xornada un conciertu d’Albióis, Bacotexo y Amarradizo, grupos qu’empleguen toos el gallego-asturiano, nesi mesmu llugar baxo’l nome de ‘Cántigas de noso’.

Visita al taller d’Herminio Álvarez con places llendaes

El domingu l’Asociación de Bolos de Miudeira va facer una tirada de bolo rodao a les 11 hores nel Complexo Cultural, onde va representase a les 12.30 la obra pa un públicu familiar ‘Xan soldao’, de Carlos Alba. A les 11.30 va facese una visita al taller del escultor Herminio Álvarez n’A Caridá, pa lo que ye necesario inscribise nel corréu electrónicu xuntoiroccidente@gmail.com.

“Trátase d'úa convocatoria que vai deixar comprobar a medría cultural d'esta llingua, disfrutando en familia das muitas actividades programadas”, apunten dende la Viceconseyería de Cultura, Política Llingüística y Deporte, promotora del Xuntoiro.

Na semeya, trompa o birimbao, instrumentu que se pretende recuperar cola puesta en marcha del Proyecto Avareira.