El Gobiernu declara’l nivel de prealerta n’Avilés y Castrillón por calidá mala del aire

|

Mediu Ambiente activó na mañana del martes na redolada de la ría d'Avilés el nivel de prealerta que prevé’l Protocolu d'actuación en situaciones meteorolóxiques qu'enzanquen la dispersión de contaminantes na atmósfera. Encamienta a les empreses de la zona a aplicar les midíes previstes nestos casos.

La ciudadanía, al traviés del 112 Asturies, y los conceyos d'Avilés y Castrillón foron avisaos de la midida, los primeros pa un usu moderáu de vehículos y la utilización del tresporte públicu, asina como pa reducir l’encendíu de calefacciones de combustibles sólidos, y los segundos pa la intensificación de la llimpieza por riegu de los viales asitiaos nel área de mayor afeición. La situación de prealerta tamién se treslladó a l’Autoridá Portuaria y a les empreses de la zona “pa qu'amenorguen al mínimu'l movimientu y tresporte de material que llevante polvu, mesmo que pa caltener húmedos de manera continua tolos viales y focos de contaminación difusa”.

La razón de l’activación d’esti nivel de prealerta vien pola superación de la llende de partícules de diámetru inferior a 10 micres (PM10) –50 microgramos per metro cúbicu de media diaria– nes estaciones de Llano Ponte, La Guitarra y Salinas mientres trés díes consecutivos. El protocolu va desactivase una vegada remate'l fenómenu meteorolóxicu qu'enzanca la dispersión de contaminantes y se constate’l descensu de los valores de partícules PM10, dalgo qu’entovía nun se produxo, polo que va continuar al menos hasta mañana, según confirmó güei la Conseyería d'Infraestructures, Ordenación del Territoriu y Mediu Ambiente.

Contador Estadistiques