“El Gobiernu de coalición debería atender la reivindicación histórica de la especialidá docente”, afirma González Riaño

El presidente de l’Academia de la Llingua Asturiana (ALLA), Xosé Antón González Riaño, aconceyó esti llunes na sede de la Conseyería d’Educación con Lydia Espina. “Plantegáronse temes nos qu’hebo postures comunes, propuestes que se pueden facer acordies cola norma llegal”, valoró’l caderalgu, que considera que "Les Escuelines ha ser el términu alministrativu oficial pal 0 a 3".

“La conseyera tien un perfil políticu, de venceyamientu col discursu oficial del Gobiernu de compromisu pa col asturianu”, apuntó rescamplando les coincidencies esistentes a lo llargo de la xunta que, sicasí, “faen falta llevar a la práutica”. Nesi sen, recordó, magar qu’agora la política llingüística nun ta dientro de la Conseyería d’Educación, “l’exe de la política llingüística ye la escolarización”.

Ente los temes trataos tuvo la creación de Les Escuelines “o Escolías n’eonaviegu", que "ha ser el términu alministrativu oficial pal 0 a 3 años”. Pa esta etapa l’ALLA reclama, “sobre manera pa los 2-3 años, la ellaboración de materiales pa llevar a les aules y espacios educativos, y formación del profesoráu en llingua y cultura d’Asturies”.

“Hai que trabayar dende yá, que se ta faciendo la normal llegal, nello”, añadió. Entrugáu sobre l’ausencia de la Llingua Asturiana y el Gallego-asturiano nel currículu d’Infantil, recordó que les llingües y cultura asturianes tienen encaxe nel Área de Comunicación y Representación, polo que ye “factible” la so presencia nes aules.

Tamién se faló de “la necesidá de producciones n’asturianu en RTPA de validez educativu y pedagóxicu qu’homologue al asturianu y ayude a normalizar l’idioma ente la población”. Pa completar, tratóse la necesidá d’ameyorar la estructura organizativa de la conseyería “que permita facer un control de la escolarización, dar colos puntos fuertes y febles”, p’algamar una presencia escolar de la llingua más afayada a les espeutatives sociales.

Paralizada pol ministeriu

Ente les propuestes presentaes dende l’ALLA a Espina, que tuvo acompañada por David Artime, direutor xeneral d’Ordenación Académica, yá treslladaes nel so momentu al presidente Adrián Barbón y a la viceconseyera de Cultura, Política Llingüística y Deporte, tuvo la vieya demanda de la creación de la especialidá docente, paralizada pol Ministeriu d’Educación y Formación Profesional pola falta d’oficialidá. “La conseyera treslladó’l compromisu de siguir insistiendo en que se modifique’l real decretu”, apuntó González Riaño, que considera qu’esta cuestión podría tener encaxe inclusive ensin el marcu llegal afitáu pol Estáu pa les llingües de los diferentes territorios billingües.

“El Gobiernu de coalición, qu’inclúi a Sumar, debería atender esta reivindicación histórica d’Asturies”, asegura’l presidente de la institución académica énte la puerta zarrada pola ministra. El camín, esplica, pasaría por incluyir nel real decretu “la especialidá docente de llingües con reconocencia xurídica y implantación curricular, a pidimientu de la comunidá autónoma”.

La recuperación de les esperiencies d’usu vehicular del asturianu o la necesidá de cuntar con materiales curriculares afayaos a la LOMLOE y al Decretu del Currículu del Principáu d’Asturies foron otres cuestiones treslladaes por González Riaño a Espina y Artime nuna xunta “que valoro de forma mui positiva”. Temes, toos ellos, sobre los que s’alcordó facer un siguimientu conxuntu.

Na semeya, Espina, Artime y González Riaño.