El Gobiernu d’Asturies fai un apueste pol software llibre

Per primer vegada, el Gobiernu asturianu dio anuncia de la implantación de software llibre nos sistemes informáticos de l'alministración autonómica.

Según se dio anuncia ayeri, tolos programes y desarrollos que se faigan d'agora en p'alantre pa l'alministración autonómica van tener qu'encontase nun entornu de desarrollu de software llibre de llicencia comercial. La implantación de Linux va facese pasín ente pasu n'alministración asturiana, que sorraya que va consiguir con ello a llargu plazu una mengua significativa de costes al nun tener que pagar llicencies millonaries a la empresa Microsoft y qu'amás gracies a ello va poder desarrollar el texíu empresarial que trabaya'l sector de les nueves tecnoloxíes. El modelu LinEX de la Xunta d'Estremadura ye ún de los modelos pa los que va mirar Asturies a la hora de facer el so desarrollu propiu.

Ente les primeres aplicaciones a desarrollar n'Asturies en Linux van tar los sistemes d'impresión d'archivos, la creación de la rede interna de comunicaciones (DNS o Radius) y la creación d'un entornu de desarrollu o 'framework' nuevu dafechu que va llamase FW-PA, d'usu obligáu pa toles empreses que suministren software al principáu. Esti entornu de desarrollu parte de tecnoloxía Apache y nel desarrollu del mesmu trabayaron too empreses asturianes como Satec, Intermark, Seresco y Felguera TI, ello amás col sofitu de la fundación CTIC y otros especialistes a títulu individual.

L'emplegu de Linux nos sistemes informáticos del Principáu yera una de les condiciones del Pautu de Gobiernu d'Asturies ente PSOE y IX-BPA y pue suponer un reblagu n'adopción de plataformes de códigu abiertu nos sistemes informáticos de les alministraciones asturianes. A nivel de conceyos, va yá añu y mediu que Villaviciosa y Nava aprobaron mociones a favor del software llibre presentaes por Izquierda Asturiana. Según especialistes n'informática de la Universidá d'Uviéu consultaos por Asturies.com, anque entovía ye temprano pa ver como se desarrolla'l cambéu a plataformes Linux, l'anuncia del Gobiernu asturianu valorase como daqué positivo.