El Gobiernu dará a conocer el martes los detalles de la ‘normalidá nueva’

|
Congresu aprobación sesta prórroga estáu d'alarma

L’estáu d’alarma va siguir hasta’l 21 de xunu tres dar el preste’l Congresu a la sesta prórroga pidida pol Gobiernu, que será la última. Esi día los territorios que cumplan les condiciones llegarán a la ‘normalidá nueva’, que va regulase por un Real Decretu-llei que’l Conseyu de Ministros va aprobar el martes.

El Gobiernu de coalición de PSOE y Xuníes Podemos algamó 177 votos a favor gracies a los mesmos apoyos que na anterior ocasión: Ciudadanos, EAJ-PNV, Más País, Coalición Canaria, Nueva Canarias, PRC y Teruel Existe. La gran novedá foi’l pasu d’ERC a l’astención, onde se caltuvo na anterior votación el so sociu de Sobiranistes, mentes que siguieron nel non Isidro Martínez Oblanca (Foro) y los diputaos del PP, Navarra Suma, VOX, Junts per Catalunya, CUP y Compromís, sumando un total de 155 votos en contra.

Ésta va ser la última prórroga del estáu d’alarma, confirmó’l presidente Pedro Sánchez. El 22 de xunu ta previstu’l pasu a la ‘normalidá nueva’, cola apertura del movimientu ente territorios, previsiblemente cola condición de que tean na mesma fase epidemiolóxica. La situación hasta’l descubrimientu d’una vacuna o tratamientu eficaz contra la COVID-19 va regulase al traviés d’un Real Decretu-llei que l’Executivu va aprobar el martes.

Ésti va detallar toles midíes de “prevención, contención y coordinación” pa facer frente a la crisis sanitaria, ente les que tarán la obligación d’usar mázcara y la distancia social. Mientres llega la normalidá nueva, na fase 3, a la que pasará Asturies el llunes, les autonomíes van garrar el mandu de la xestión del estáu d’alarma.

Contador Estadistiques