El Gobiernu da'l preste a la rebaxa nel portalgu de l'autopista del Val.le Güerna

El Conseyu de Ministros aprobó ayeri, per aciu de Real Decretu, la rebaxa del importe del portalgu a vehículos llixeros qu'usen davezu l'autopista Campumanes-Llión o 'autopista del Val.le Güerna', "en cumplimientu del compromisu tomáu pol presidente del Gobiernu. La rebaxa pue llegar hasta'l 50% en función de los viaxes realizaos.

La midida, que va entrar en vigor el 1 de xineru del 2008, va beneficiar a los vehículos llixeros que realicen más d'un viaxe pa dir y tornar completu pola autopista nel mes.

Ello ye, aquellos vehículos llixeros qu'efectúen dos viaxes al mes van tener un descuentu conxuntu del 25 por 100; los que faigan tres viaxes van beneficiase con una rebaxa del 33 por 100, con 4 viaxes, el descuentu va algamar el 38 por 100, y asina sucesivamente.

L'aplicación d'esti descuentu va venir asociada de primeres al pagu del peaxe, utilizando cualquier sistema magnéticu o electrónicu instaláu pal cobru, ye dicir, tarxetes de creitu.

Nesti momentu, la empresa concesionaria ta implantando'l sistema de peaxe dinámicu conocíu como 'Vía T'. Una vez implantáu esti sistema y trescurríos seis meses dende la plena operatividá del mesmu, va ser obligatoria la utilización d'esti sistema d'abonu pa beneficiase de la rebaxa.



Pa poder desarrollar esta midida el Conseyu de Ministros autorizó al Ministeriu de Fomentu llegar a compromisos de gastu con cargu a exercicios futuros, de manera que pueda compensar económicamente a la sociedá concesionaria, Autopista Concesionaria Astur-Leonesa, S.A., pola reducción.

El costu de la midida nel añu 2008 estimóse en 2,5 millones d'euros, cantidá que se verá aumentada nos siguientes exercicios, hasta'l final del periodu de concesión (17 d'ochobre del 2050), colos icrementos por revisión de tarifes y polos crecimientos vexetativos del tráficu.

La rebaxa que contempla esti Real Decretu enmárcase nel procesu de reducción progresiva del portalgu en dicha autopista onde, dende febreru del 2006, ya se ta aplicando un descuentu del 30% del importe del peaxe a tolos vehículos pesaos.

El voceru del grupu parlamentariu socialista, Fernando Lastra, calificó la rebaxa anunciada pol Gobiernu pal portalgu de l'autopista del Val.le Güerna como "positiva, anticipada y que supón un pasu considerable nel compromisu de Zapatero d'eliminar de manera total el peaxe".

Lastra manifestó, en declaraciones a l'axencia Europa Press, que la midida anunciada ye de "una importante repercusión económica" y destacó que xunto cola rebaxa de la que ya disfruten los tresportistes profesionales ye la "primer vez na historia del portalgu" que se toma una midida na llinia de supresión del mesmu.

Sobre les crítiques del PP y IX hacia la rebaxa anunciada por Zapatero, Lastra indicó que "últimente les crítiques de dambos grupos caracterícense por ser rácanes y mezquines". "Van poder dicir lo que quieran pero nun resten importancia a un fechu tan importante pa los ciudadanos como'l que güei s'anunció", concluyó Lastra.