El gobiernu asturianu refuercia l'autoridá de los profesores

El Conseyu de Gobiernu aprobó ayeri un Decretu pol que se regulen los derechos y deberes del alumnáu y que fomenta la convivencia nos centros docentes non universitarios del Principáu d'Asturies. Trátase con ello de definir con exactitú los derechos y deberes del alumnáu, favorecer la disciplina a tolos niveles y reforciar l'autoridá de los profesores y equipos directivos.

Según esplicó en rueda prensa Ana Rosa Migoya, el decretu aprobáu recueye, ente otros aspectos, la voluntá de la Conseyería d'Educación d'algamar la resolución de conflictos mediante procesos de mediación, potencia l'autonomía de los centros y establez les competencies de los sos órganos de gobiernu en materia de correcciones educatives nel alumnáu, al tiempu qu'incorpora'l derechu a la evolución oxetiva del rendimientu escolar del alumnáu como derechu esencial.

El Decretu recueye que l'incumplimentu de les normes de convivencia estblecíes por cada centru va suponer l'aplicación de correcciones educatives. Asina, los actos que perturben el normal desarrollu de les clases, l'ausencia de collaboración per parte del alumnu, les faltes inxustificaes de puntualidá y asistencia y el tratu incorrectu a los compañeros son exemplos de conductes contraries a les normes de convivencia.
Les sanciones previstes pa una falta d'esti tipu van de l'amonestación oral, el cambiu de grupu o la suspensión del derechu d'asistencia al centru por un periodu máximu de tres díes. Ente les conductes tipificaes nel decretu como gravemente perxudiciales pa la convivencia ta l'agresión física escontra cualquier miembru de la comunidá educativa, les inxuries y les ofenses, les actuaciones perxudicales pa la salú y la integridá personal o les humillaciones, amenaces y suplantación de personalidá n'actos de la vida docente.


Les midíes correctores pa estes conductes puen implicar la realización de llabores fuera del horariu llectivu, la suspensión del derechu a participar nes actividaes estraescolares, el cambiu de grupu, la suspensión del derechu d'asistencia al centru por un periodu inferior a un mes o'l cambiu de centru. En tolos casos, la persona encargada d'imponer les midíes de corrección oportunes va ser el director del centru.

Ente los derechos fundamentales del alumnáu'l Decretu estaca'l derechu a la formación, a la valoración oxetiva del rendimientu escolar, al respetu de les convicciones, a la identidá, integridá y dignidá personal de participación d'aconceyamientu y asociación, a la manifestación de discrepancies colectivamente, a la información y llibertá d'esresión, a la orientación educativa y profesioanl y a la igualdá d'oportunidaes y a la protección social.


De la mesma manera, ente los deberes inclúyense nel Decretu'l deber d'estudiu, l'asistencia a clase y esfuerciu, el de respetu al profesoráu, el de respetu a los valores democráticos y a los demás miembros de la comunidá educativa, el de respetar les normes de convivencia, organización y disciplina del centru docente y el deber de collaborar nel llogru d'información per parte'l centru.

El decretu insta a cada centru educativu a ellaborar un Plan Integral de Convivencia que tome en cuenta les característiques del entornu escolar y les necesidaes del alumnáu. De la mesma manera, establezse qu'en cada centru se constituya una Comisión de Convivencia encargada de canalizar toles iniciatives que permitan meyorar l'ambiente escolar, desarrollar iniciatives escontra la discriminación del alumnáu y evaluar el cumplimientu de les correcciones educatives impuestes.