El Gobiernu asturianu nun va retirar los símbolos franquistes de la Llaboral

La Conseyera de Cultura Ana Rosa Migoya y el director de Comunicación Jorge Fernández León, ficieron ayeri una presentación del estáu de les obres de remocique de la Universidá Llaboral de Xixón. L'oxetivu del Gobiernu asturianu ye poder abrir la Llaboral al públicu, anque dellos de los sos espacios,los acutaos pa la enseñanza, yá tan entamando a funcionar. Asina, el Centru Integráu de FP, la escuela universitaria d'Empresariales y la de Trabayu Social yá van entamar el cursu na Llaboral, mientres que la Escuela Superior d'Arte Dramáticu ta pa facelo y la TV autonómica yá dispón del conventu de les Clarises.

Entovía falta por rematase la obra en delles partes del xigantescu edificiu de 130.000 metros, ente elles lo que va ser l'hotel o la obra del conservatoriu de música, amás del remocique de les pistes de deportes o de los xardinos, nos que se cuenta con asitiar un restorán. El gran centru d'arte, con una sala d'esposiciones de grandes dimensiones fecha dende lo que yera un polideportivu, ye otru de los grandes proyectos de la Llaboral remocicada.

Nel trescursu de la visita la titular de cultura y portavoz del Gobiernu aclarió que nun van retirase los símbolos franquistes de los que ta estráu l'edificiu en cuantes que son "representativos del momentu históricu nel que se concibió la llaboral". Ana Rosa Migoya echóse al pie del caltenimientu del proyectu orixinal del arquitectu Luis Moya pa defender la permanencia de los adornos franquistes, ente ellos l'águila que preside la fachada del teatru.

No tocante a esti espaciu, ún de los más afectaos pola obra, la Conseyera esplicó que van caltenese les sos históriques butaques, que van llevase al paraninfu de la Universidá d'Uviéu, pero en cuenta de la pellaya orixinal de la que taben forraos, los asientos de la Llaboral van recibir otru revestimientu más modernu. Ello ye que, según esplicó Migoya,les butaques de la Llaboral, que siempre se tuvieron por tar feches de pelleya de camellu son en realidá de cabra, acordies con documentos y factures orixinales de cuando se fexo l'edificiu. Los mesmos documentos conseñen que los asientos costaron 3 millones de pesetes de les de l'añu 1950, dalgo que da una idea de la corrupción pola que se mandó la construcción del edificiu, al dicir de la Conseyera, que tamién esplicó que les inversiones públiques nel remocicamientu de la Llaboral yá pasen de los 56 millones d'euros.