El Gobiernu asturianu niega ser el promotor del llibru anónimu que fai propaganda de los sos proyectos

El Gobiernu asturianu emitió ayeri una nota oficial na qu'afirma que "nin financió nin ye'l promotor" de la obra editorial "Construyendo Asturies" qu'estos díes ta llegando a los buzones y portales de miles d'asturianos y na que se fai propaganda, a lo llargo de 160 fueyes editaes a tou color, de les iniciatives y proyectos del Gobiernu asturianu. Dende la portavocía de la conseyería de Presidencia aseguróse que "nun esiste rellación contractual nin económica alguna col editor". Dende Presidencia reconozse que sí que "se facilitó información pública, tal y como diximos a lo llargo de los últimos díes" afirmándose que la collaboración cola empresa editora del llibru llevóse alantre "nos mesmos términos que se fai davezu con tolos medios y empreses que nos faen piticiones asemeyaes".

La rempuesta del Gobiernu desvinculándose de toa rellación col llibru vieno al rau de les crítiques del PP, que rellacionó l'autoría de la obra col executivu asturianu y especialmente en rempuesta a les declaraciones del Presidente del Partíu Popular Ovidio Sánchez, que dixo que'l llibru s'editare col pagu d'empreses beneficiaes pola contratación d'obra pública y que se veríen obligaes a pagar por ello lo que Sánchez calificó de "impuestu revolucionariu". Presidencia afirmó qu'estes declaraciones yeren falses dafechu y guardóse'l derechu a llevar a Ovidio Sánchez a los tribunales por faceles "ensin apurrir preba nenguna". Pa la portavocía delo Gobiernu, ye Ovidio Sánchez "el que ta apertando sobre les empreses que s'anuncien na obra pa que dean una versión que concueye colos sos intereses". Presidencia defende a los anunciantes qu'apaecen na obra y declara que nun almite "qu'Ovidio Sánchez se llevante como portavoz non autorizáu d'empreses solventes y de prestixu que tomen les sos sus propies decisiones y estratexes comerciales".