El gobiernu asturianu despeya la incógnita del contratu de telecomunicaciones

Telefónica va llevar el contratu de la telefonía fixo y datos, Auna'l de telefonía móvil y Telecable gana namás el contratu d'accesu a internet.

La empresa asturiana de telecomunicaciones Telecable va llevar el contratu d''accesu a internet de l'alministración asturiana por importe d'un millón y mediu d'euros. Con ser una bona anuncia pa la empresa asturiana, Telecable queda nesti importante concursu col "premiu pequeñu", y ye que la tayada grande del contratu, el serviciu de telefonía fixo y datos va dir pa la multinacional Telefónica. La tercer parte del concursu, el suministru de telefonía móvil a l'alministración, queda en manes d'Auna.

El Gobiernu asturianu, al traviés de la Conseyería d'Economía y Alministraciones públiques, ta acabante de dar a conocer el resultáu del concursu pol que l'alministración autonómica renueva'l contratu de tolos sos servicios de telecomunicaciones. Dixebráu en trés paquetes, el primeru pa telefonía fixo y datos y con un importe de llicitación de 40 millones d'euros, el segundu pa la telefonía móvil por importe de 6 millones d'euros y el terceru pal accesu a internet por importe de 1,5 millones d'euros, el concursu suponía una importante tayada económica a la que se presentaben en competencia directa la multinacional d'aniciu español Telefónica y la empresa asturiana Telecable, que se comprometiere a crear 80 puestos de trabayu nel país en casu de consiguir el concursu.

A la fin, los 40 millones del contratu grande van dir pa Telefónica, que según destaca la Conseyería, comprometióse a esparder per toa Asturies la la tecnoloxía de banda ancha MAN Ethernet con una inversión de 9 millones d'euros. La ufierta de Telefónica algamó les meyores puntuaciones nel separtáu técnicu y nel económicu.


En cuantes a la concesión a Auna del contratu de telefonía móvil, la conseyería sorraya que la empresa titular de la marca de telefonía móvil Amena comprometióse na so ufierta a invertir10 millones d'euros nun plazu de 18 meses pa enanchar la so rede n'Asturies hasta convertise na compañía con meyor cobertura GSM/GPRS y llegar colos sos servicios 3G/UMTS al 94% de la población.

Telecable gana'l tercer paquete del concursu, consistente nel suministru d'accesu web a toles dependencies de l'alministración asturiana, incluyendo centros d'educación y los pertenecientes a la rede sanitaria. La empresa que dirixe Roberto Paraja presentábase a esti concursu en collaboración con British Telecom y Auna como socios, y presentó una ufierta que rebaxaba nel 15,6% el preciu de llicitación.