El Gobiernu asturianu defende l’usu de les llingües cooficiales españoles en Bruseles

El Comité de les Rexones (CdR) de la UE qu'aconceyaba ayeri en Bruseles, votó al favor d'una propuesta vasca sofitada ente otres comunidaes autónomes por Asturies na que se-y pidía al Parlamentu Européu qu'autorice l'usu de les llingües cooficiales d'España. La Conferencia de presidentes de la UE va tratar güei l'asuntu.

La propuesta presentárela'l comisionáu del lehendakari vascu pa les Rellaciones Esteriores, José María Muñoa y contó col sofitu d'Andalucía, Asturies, les Islles Baleares, Canaries, Comunidá Valenciana y Extremadura, encamentando testualmente al Parlamentu Européu a que "siga los pasos del CdR en cuantes a la firma d'un alcuerdu que permita l'emplegu dafechu de las llingües cooficiales en dicha institución, dempués de vese qu'esta esperiencia foi mui positiva nel CdR".

Ello ye que dempués de refugar l'emplegu de les llingües cooficiales españoles nes sesiones plenaries, la mesa del Parlamentu Européu tien d'esaminar la solicitú d'España pa que se permita que los ciudadanos puean unviar entruga y recibir rempuesta en gallegu, euskera y catalán y que se traduzan a estes llingües los testos llegales. El calter de non oficial de la llingua asturiana dexó al asturianu fuera de tou reconocimientu nes instituciones comunitaries, un reconocimientu que'l gobiernu asturianu sí pide pa les demás llingües que se falen nel estáu y que sí tienen reconocíu l'estatus oficial.