El Gobiernu asturianu confirma dos casos de desapaecíos asturianos n'Arxentina

El director de l'Axencia Asturiana de Cooperación al Desarrollu Rafael Palacios, confirmó ayeri dos casos nuevos d'asturianos desapaecíos durante la dictadura militar arxentina ente los años 1976 y 1983. Palacios nun quier que se conozan los nomes delos desapaecíos "hasta que nun se compreben exactamente les sos identidaes y situación". Los dos casos que se conocieron agora amiéstense a los ocho que yá taben documentaos y denunciaos pola Axencia Asturiana de Cooperación al Desarrollu.



Otramiente, Palacios punxo ayeri en conocimientu de la Secretaria d'Estáu de Cooperación Internacional, Leire Pajín, nuna reunión en Madrid, una carta qu'unvió la Comisión de Desapaecíos Españoles n'Arxentina na que les families esixen la creación de la figura de "Desapaición Forzada" nel estatutu de los derechos de los ciudadanos nel esterior, una figura llegal que diba permitir la reparación moral y económica a los familiares de los desapaecíos. Les families esixen también la creación d'una "Comisión de la Verdá" que llegue a un alcuerdu col gobiernu arxentinu dientro del marcu xurídicu internacional pa dar col paraderu de los desapaecíos. Les families piden igualmente una garantía de servicios xurídicos a les families de les víctimes y que s'apaute'l 30 de setiembre como "Día de la Memoria".