El gobiernu asturianu aprobó’l proyectu d’urbanismu y ordenación del territoriu

El Conseyu de Gobiernu dio ayer el preste al proyectu de reglamentu d’urbanismu y ordenación del territoriu y al borrador de la estratexa de desarrollu sostenible del Principáu d’Asturies. La portavoz del Gobiernu, Ana Rosa Migoya afirmó que’l primer de los documentos aprobaos ye "una figura llargamente demandada pol sector y tolos profesionales implicaos, incluyíes les alministraciones públiques".

La conseyera expuso que’l Reglamentu tien como oxetivu desarrollar el Testu Refundíu de la Llei del Suelu Asturiana y va convertise, una vez aprobáu, nel primer Reglamentu d’una Comunidá Autónoma que desendolque íntegramente les materies d’ordenación territorial y urbanismu. D’esti mou, el documentu va sustituir siete reglamentos supletorios estatales, derogará cuatro reglamentos autonómicos que tienen una regulación qu’agora asume, y regulará nueves materies hasta agora ensin desarrollu reglamentariu.

En cuantes a la ellaboración d’una Estratexa de Desarrollu Sostenible autonómica, esta taba conseñada nel alcuerdu políticu robláu poles dos formaciones qu’integren el Gobiernu, el PSOE y IX-BA. La portavoz del gobiernu asturianu afirmó que "pol so propiu carácter, la ellaboración d’una Estratexa de Desarrollu Sostenible ye un procesu llargu nel tiempu que requier de la preparación d’un bon númberu de documentos socesivos que van esmigayando los principales temes y cuestiones".