El Garrapiellu echa'l piesllu de los Xuegos Intercélticos

Güei celébrase la ceremonia de clausura de los Xuegos Naúticos Intercélticos, a los qu'echa'l piesllu la Olimpiada de Deportes Tradicionales d'El Garrapiellu.

Los Xuegos Náuticos Intercélticos echen el piesllu en Xixón dempués de dellos díes de competiciones acátiques nes que participaron deportistes d'Asturies, Galicia, Euskadi, Bretaña, Cornualles, Escocia, Irlanda y la rexón norte de Portugal, mientres que les Canaries, Cantabria y Cataluña asistieron como convidaes. Gales foi la única ausente nestos xuegos que yá se celebraron en Xixón nel añu 2001 y qu'anguaño contaron con competición nes modalidaes de Vela, Remo, Surf, Piragüismu y Actividaes Subacuátiques (Fotografía Submarina y Natación con aletes). Un mercáu celta, que va siguir abiertu mañana en Xixón, completó estos xuegos nos que participaron 600 deportistes. Les competiciones rematen esta tarde cola ceremonia de clausura a les 5 de la tarde y la entrega de medalles va facese esta nueche nuna sala de fiestes de Xixón

Pela so parte, la olimpiada de deportes tradicionales asturianos d'El Garrapiellu, que se fai anguaño coincidiendo col final de los Xuegos entama oficialmente cola inauguración a les 12 del mediudía, dedicándose la mañana d'esti día íntegramente a la distintes disciplines del deporte de los bolos, mientres que les demás competiciones, qu'incluyen tolos deportes tradicionales federaos, qu'incluyen ente elles les de llave, corta de tueros, tiru cuerda o baltu y una exhibición de tiru con gomeru.