El Garrapiellu dio los sos premios lliterarios

La obra "Pretéritu imperfeutu" de Pablo Tejón Castañón ganó la XII edición del concursu de cuentos qu'oraniza la tertulia cultural "El Garrapiellu", mientres que'l relatu "Les fíes de Miguel Xuan" obra del conocíu periodista y escritor Quique Faes llevó un accesit .

El xuráu emponderó la calidá media de los trabayos presentaos al concursu, que sigue afitándose como una semientera de nuevos valores pa la narrativa asturiana. Sobre la obra ganadora, el xuráu destacó que'l cuentu parte del xenéricu referencial de la Guerra Civil pa ellaborar un discursu lliterariu d'especial coherencia cola memoria como filu unificador, mientre que na obra de Quique Faes valoró el ser una amuesa de narración afitada a referenciales lliteraries d'especial valir, citando ente elles a J.L. Borges y que llanza una mirada doliosa y intimista sobre la emigración.

El xuráu del Concursu formáronlu nesta XII edición l'académicu de la llingua Urbano Rodríguez, los escritores Milio R. Cueto y Adolfo Camilo Díaz, el Profesor Antonio Alonso de la Torre y el ganador del concursu l'añu pasáu, Constantino Álvarez Lafuente.