El Garrapiellu convoca'l so concursu de cuentos

La tertulia cultural "El Garrapiellu" convoca la XV edición del so concursu de cuentos curtios n'asturianu. Empobináu a tolos autores mayores de 16 años, el certame, un clásicu dientro de les convocatories creatives n'asturianu, ufierta un primer premiu de 900 euros y un segundu de trescientos, amás de la espublización de les obres ganadores nun futuru III volume de cuentos curtios editáu pola tertulia.

Les normes apauten que namás pue presentase ún trabayu per autor, y qu'esti nun ha pasar de les 12 fueyes escrites a máquina a doble espaciu per una sola cara, siempre con temática llibre. El plazu pal unviu d'orixinales ta abiertu hasta'l 20 de mayu y les señes pa mandar los orixinales son les de la Tertulia Cultural "El Garrapiellu" nel apartáu de correos 8133 - 33280 de Xixón. El sobre, nel qu'ha conseñase "XV Concursu de Cuentos Curtios El Garrapiellu" ha llevar l'orixinal del cuentu col títulu y trés copies baxo plica, amás d'otru sobre cola plica l'autor y el títulu del cuentu escritu per fuera, con datos personales y teléfonu de contactu. El fallu del concursu va facese'l 10 de xunu.