El gallu montés y la biodiversidá asturiana, na conferencia d'Ástura

Va ponela la veterinaria de fauna salvaxe María Suárez Álvarez nel Atenéu Obreru de Xixón.

La conferencia sobre cultura asturiana de l'asociación Ástura d'esti mes lleva'l títulu de 'La fauna salvaxe n'Asturies y el trabayu veterinariu'. Ésta va centrase n'esplicar "la increyible biodiversidá que mos arrodia y el trabayu de los profesionales del sector, centrándonos en mamíferos y aves y poniendo especial enfotu nuna de les especies más emblemátiques y desconocíes fuera d'Asturies: el gallu montés cantábricu o faisán, ave cola que la ponente trabayó a lo llargo de 15 años, especialmente dende'l proyeutu de cría en cautividá, más tol trabayu de campu que se fai cola especie nel Cordal Cantábricu".

Suárez Álvarez, doctora y bióloga especializada en reproducción animal, vien trabayando con fauna montiega dende'l 1999 "coordinando proyeutos de caltenimientu ex situ d'especies protexíes, como asesora en temes reproductivos, como veterinaria en centros de rescate y rehabilitación de fauna salvaxe, dirixendo investigaciones sobre'l comportamientu animal y participando na ellaboración de censos, captures y radiomarcaxe, amás de tol trabayu de campu venceyáu a estes actividaes". apunten dende Ástura. Nos últimos 4 años asesora al Ministeriu pa la Transición Ecolóxica en temes reproductivos y veterinarios del proyeutu de caltenimientu ex situ del gallu montés y los trés últimos llustros collabora col Gobiernu d'Asturies en delles xeres.

Esta cita cola biodiversidá asturiana y un animal tán icónicu, en peligru de desaniciu, como'l gallu montés, va ser esta tarde a les 19 hores. La entrada al llar social del Atenéu Obreru, asitiáu nel segundu pisu de la Escuela de Comerciu, ye llibre.