El fiscal peslló'l "Casu Sopeña"

El fiscal xefe del Tribunal Superior de Xusticia d'Asturies, Gerardo Herreo, ordenó l'archivu del conocíu por "Casu Sopeña" al nun albidrar na información disponible prebes de delitu nin irregularidaes al rau de l'actuación del senador del PP Javier Sopeña como intermediariu na venta d'una riestra de faces pa la edificación.

El fiscal pesllaba d'esta miente una investigación entamada nel mes de abril, cuando s'asoleyaron unes grabaciones de conversaciones telefóniques apurríes pola Federación Socialista Asturiana (FSA-PSOE) nes que'l senador del PP y conceyal uvieín Javier Sopeña, mediaba na venta de terrenos nel occidente d'Asturies col ganaderu Regino Canteli, que se sintió traicionáu al non consiguir la comisión que pretendía na venta. La comisión, que podía ser de cerca de 19 millones de les antigües pesetes en dineru negro, nun llegó a materializase al nun concretase la tresacción. Les más de les conversaciones grabárense nel despachu del abogáu Juan Muñiz, amigu del senador popular, y nelles intervién tamién el presidente de la Confederación Asturiana de la Construcción (CAC), Serafín Abilio Martínez.

Anque nun ve prebes de delitu, el fiscal sí que-y reconoz fundamentu a la denuncia, xustificándola énte'l deber y obligación de tolos ciudadanos de denunciar cualquier sospecha de delitu.