El Festival Interceltique de Lorient del 2024: más curtiu y dedicáu a "la mocedá celta"

Los Xuegos Olímpicos de París obliguen recortar la duración del LIII Festival Interceltique de Lorient. La gran cita deportiva va celebrase del 26 de xunetu al 11 d’agostu y la movilización de seguridá al rodiu la Olimpiada obliga a dellos eventos franceses, por mandáu del Gobiernu, a modificar les sos feches, polo que’l certame bretón del 2024 va tener llugar del 12 al 18 con "la mocedá celta" como protagonista.

La edición próxima del Interceltique nun va tar dedicada a nengún país, como ye vezu. La organización comunicó ayeri que la del añu qu’entra va protagonizala “la mocedá celta”.

“El Festival Interceltique de Lorient ye y sigue siendo interxeneracional: ye una de les sos principales fortaleces na promoción del interceltismu”, apunten. Por eso va aprovechase l’añu condicionáu polos Xuegos Olímpicos en Francia pa promocionar y potenciar a los artistes mozos de les diferentes naciones celtes.

En concreto, el cincuentenu tercer certame va desenvolvese de llunes a domingu, del 12 al 18 d’agostu. Esto ye, va principiar al día siguiente de la clausura de Paris 2024, perdiendo trés díes y retrasando una selmana les feches habituales obligaos pola Alministración francesa pola movilización en seguridá que va suponer la cita olímpica.

A la espera del segundu Celtic Odyssée

La delegación asturiana sigue protagonizando actuaciones hasta arriba de públicu n’An Oriant. Estos díes últimos Algaire y José Manuel Tejedor ufrieron una doble actuación, mentes que la Banda de Gaites de Castrillón tocó na tarde del martes nel Espace Jean-Pierre Pichard, l’escenariu principal del Interceltique, na estaya Musique et Danses des Pays Celtes, amás de representar a Asturies xunto col Grupu de Baille Tradicional Fitoria nel espectáculu Horizons Celtiques, qu’esta nueche vive la so última sesión.

Mañana, a les 21.30 hores nel propiu Espace Jean-Pierre Pichard, va tener llugar ún de los momentos más esperaos del festival: la celebración del segundu Celtic Odyssée, que xunta a músicos de toles naciones celtes. Repite’l gaiteru José Manuel Tejedor de la primer edición, na qu’Asturies tamién tuvo representada por Silvia Quesada, y nesta ocasión el segundu representante asturianu va ser Rubén Bada, col bouzouki.

Va completar les actuaciones asturianes nesta edición del Interceltique el dúu L-R, compuestu por Leticia Baselgas y el propiu Bada, el domingu. Va ser les 11.30 hores nel escenariu de la Place des Pays Celtes xunto cola banda internacional Fourth Moon.

Na semeya, un momentu de l'actuación d'ayeri José Manuel Tejedor na Quai de la Bretagne dientro del ciclu La Bretagne Invite.