El Festival de Lorient recibió'l reconocimientu del mundu de la sidra

Jacques Charles Morice, Presidente del Festival intercélticu de Lorient, Jean Pierre Richard, ex - Director y creador del certame, y el nuevu director del mesmu, l'asturianu Lisardo Lombardía, recibieron ayeri'l Premiu añal de la Fundación de la Sidra. El certame cultural de la bretaña francesa mereció'l premiu en reconocimientu al so papel como elementu de promoción de la sidra nel Arcu Atlánticu, onde la sidra compite en protagonismu cola cerveza, y pol respetu de les tradiciones que representa'l festival. Dotáu con 6.000 euros y una escultura diseñada pol artista Pablo Maojo, el premiu entregose ayeri en Colunga cola presencia del Presidente asturianu Vicente Álvarez Areces.

Los trés agasayaos col premiu van participar esti sábadu a la 1 de la tarde nuna conferencia - mesa redonda na sede de la Fundación José Cardín de Villaviciosa. La entrada al actu ye llibre y nel va facese un repasu a la historia d'esti certame creau nel añu 1971 y que tolos años, cada mes d'agostu, ye l'epicentru de les músiques de raigón n'Europa, axuntando a más de 4.500 músicos y más de 600.00 espectadores.