El Festival de Lorient, na so edición más modesta

Según les informaciones que lleguen dende Bretaña, la edición 2004 del Festival Intercélticu de Lorient ye más modesta en comparanza coles anteriores. Nun xiru popular, la entrada a dellos espacios ye de baldre, pero los recintos más importantes del certame nun abren esti añu.

Inda queda por saber cuáles son les razones, pero lo que ta claro ye que la edición 2004 del Festival Intercélticu de Lorient ye muncho más modesta que, por exemplu, la del añu pasáu. La mengua de medios conózse en que s'eliminaron espacios de conciertos como'l xigantescu "Space Marine" o en que nun hai carpes n'espacios que los años anteriores disponíen d'elles. Amás, dellos conciertos de gran interés pal públicu van facése nel Teatru de Lorient, que namás tien capacidá pa 900 persones colo que queda muncha xente fuera ensin poder ver l'espectáculu. Otros detalles que faen camentar que'l Festival tien problemes económicos ye que'l cartel de conciertos prescindió de nomes estelares, y anque si ye verdá que dellos espacios que yeren de pagu esti añu son de baldre, bien ye cierto que nel cartel d'anguaño nun apaecen Carlos Núñez, Alan Stivell o los Chieftains, por poner dellos nomes. Tamién el merchandising del Festival ta sufriendo'l recorte, y preba d'ello ye qu'esti añu nin la delegación asturiana nin nengún visitante del acontecimientu nun van poder mercar la camiseta oficial del Festival, cenciellamente porque nun se fizo. Amás del recorte d'espacios y medios, paez qu'el Festival tien la cigüa, y asina esti sábadu un incendiu de pequeñes dimensiones obligaba a sacar del Palaciu de Congresos de Lorient a la xente que participaba nel Concursu de Gaita MacCrimmon

Dende delles fontes apunten a qu'esti recorte vien por cuestiones presupuestaries, les perdes que tuvo l'añu pasáu'l festival obliguen a qu'esti añu haya que recortar gastos, sobremanera nel alquiler d'infraestructures. Amás les obligaciones que pon la llei nueva d'espectáculos de Francia llevaron al festival a programar una edición un poco más reducida. Lorient nun ye un casu aisláu, yá qu'esta nueva llei y les deldes provocaron qu'otru festival de gran importancia como ye'l festival de luthiers y artesanos de Saint Chartier tamién sufriere un recorte importante de medios.

Sicasí, ello nun-y quita ganchu al Festivalque sigue siendo un bon reclamu pal públicu qu'enllena les cais de la ciudá ensin que se note'l recorte. Pa la delegación asturiana esti ta siendo por agora un bon añu qu'entamó cola victoria d'Angel Domingo nel Mac Crimmon de Gaita (antiguu Macallan), y sigue coles actuaciones de los distintos miembros de la representación asturiana. El vienres entama'l concursu de grupos folk de Lorient cola participación de dos bandes asturianes, "Deua Dubra" y "DRD" a los que-yos salió por sorpresa una actuación nel programa del Festival aparte del concursu.