El festival de la sardina abre l’agostu candasín

Candás entama un mes d'agostu estráu d'actividaes y cultura col Festival de la Sardina que se celebra esta tarde y nel Grupu de baille "San Félix" va presentar una revista d'estudios sobre la comarca del Cabu Peñes.

Dempués d'un mes dexunetu nel que se celebró'l Festival de Bandes de Gaites de Candás y entamaron les fiestes de San Félix, Candás prepárase pa un mes d'agostu de restallu. Ello ye que les fiestes del patrón candasín van tener güei ún de los sos actos más importantes cola celebracíon del tradicional Festival de la sardina, qu'entama a les cinco de la tarde en paséu de San Antonio, xunta la escuela de la capital del conceyu de Carreño.

Ello supón l'aniciu d'un mes d'agostu nel que la folixa y la música nun van aparar na villa marinera, que celebra'l 20 d'agosti la tradicional nueche folk del Prau Gervasia, organizada por colectivos xuveniles candasinos y que anque dellos años nun pudo celebrase por falta d'alcuerdu col Conceyu, tien fecha acutada pal 20 d'agostu y la presencia asegurada de dellos grupos, ente ellos Corquiéu. Tres d'esta convocatoria, l'agostu candasín va pesllar con una cita nueva cola cultura atlántica gracies al llabor del Grupu de Baille San Félix, qu'entama del 25 al 28 d'agostu los 'I Alcuentros Atlánticos' que van enllenar les cais de la villa de sones asturianos y bretones gacies a la presencia del Bagad Gwengamp. Como complementu d'estos Alcuentros, el grupu "San Félix" presenta tamién la revista 'El Cuirno' que, con calter añal, va compilar artículos d'investigación y escritos lliterarios que tengan la comarca del Cabu Peñes como marcu de referencia. El primer númberu d'esta revista cuenta con collaboraciones de Xulio Viejo, Aurelio G. Ovies, Adolfo Camilo Díaz, Alberto Álvarez Peña o Pedro Busto.