El Festival de Cine de Xixón da un adelantu de la programación d'anguaño

Esta mañana presentóse la 42 edición del Festival de Cine de Xixón, que va desarrollase del 25 de payares al 3 d'avientu. El Festival quier afitar el so calter d'alternativu y xunta la sección oficial, entovía por rematar, va dar retrospectives del documentalista Peter Watkins, el taiwanes Tsai Ming-liang y el suecu Lukas Moodysson

El festival del 2004 crez pa ser a recibir al públicu qu'enllena prácticamente cada pase, y ye que nestos cuatro años, el festival que dirixe José Luis Cienfuegos rexistró un aumentu de públicu de más del 50%. Pa ser a recibir a tantísima xente, el Festival pasa esti añu d'ocho sales de proytección a nueve, presentando cerca de 250 películes n'horariu de mañana, tarde y nueche.

A falta de conocese los títulos de la sección a concursu, ente los ciclos retrospectivos que se presentaron esta mañana rescampla'l que se-y dedica al desconocíu cineasta y documentalista inglés Peter Watkins, ganador d'un oscar nel 1967 con "The War game" y del que va facese un repasu cásique integral de la so obra dende los sos primeros trabayos en Super-8 hasta llegar a la versión que fizo va poco de los socesos de la Comuna de París de 1870, na que recrea la historia orixinal al mesmu tiempu que fai una crítica de los gobiernos contemporáneos.

La segunda gran retrospectiva del añu va ser pa un modernu director oriental, Tsai Ming-liang. Contra'l malditismu de Watkins, el director de Taiwan tien un historial estráu de premios, como l'osu de de Plata en Berlín 97 por "El ríu", el Llión d'Oru en Venecia 94 por "Vive l'amour" y, entovía l'añu pasáu, el premiu Fipresci en Venecia 2003 por "Goodybye Dragon Inn" . Xunta les proyecciones, esti ciclu va contar tamién con un llibru sobre las obra del director coordinau por Marcelo Panozzo y cola colaboración de críticos como Santos Zunzunegui o Kent Jones

El suecu Lukas Moodysson ye'l tercer autor a retrospectiva nel festival. Ensin tener entovía 40 años, l'autor nórdicu, responsable de "Fucking Amal", "Together" o "Lilya 4ever" espeya nos sos trabayos la realidá d' una Europa alloñada del "estáu del bientar" tratando temes como la violencia social, l'esfarraplamientu de les ideoloxíes o los problemes de la mocedá pa entrar al mercáu de trabayu

Xunta estes retrospectives "d'autor" el festival va acutar sitiu pa los "cines periféricos" de los Estaos Uníos, analizando toles corrientes alternatives norteamericanes, dende les más heterodoxes y anticomerciales hasta aquelles que faen por remocicar el cine de los grandes estudios. Ello va ser
al traviés de proyecciones y tamién de la publicación d'un llibru