El Festival de Bandes de Gaites Villa de Candás cumple 15 años

El 22 y 23 de xunetu Candás va vivir una nueva edición del Festival de Bandes de Gaites Villa de Candás, que cumple 15 años. Seis agrupaciones van participar nél, ente les que destaquen una bretona, una gallega y una catalana.

 

Nestes dos xornaes, Candás va convertise na capital del Arcu Atlánticu no musical, yá que, tres 15 años de vida, el Festival entamáu pola Banda Gaites Candás ganóse un nome dientro del mundu d’esti instrumentu. Un fechu que lo demuestra ye que “tolos años lléguennos munchos correos electrónicos de bandes de fuera, sobre too bretones, que quieren participar nel Festival”, esplica José Manuel Fernández Rancaño, presidente de la Banda Gaites Candás, entidá que ta faciendo un esfuerzu importante pa sacar el certame alantre tres la perda de dellos patrocinadores nestos años últimos por mor de la crisis. Sicasí, l’apoyu del pueblu de Candás y de Carreño permite la continuidá del Festival: nes selmanes últimes los establecimientos de la villa dispusieron d’huches onde facer aportaciones económiques y vendiéronse munches camisetes a un preciu de 8 euros pa sofitar el certame.

 

Na edición d’esti añu van participar un total de seis bandes, trés d’elles asturianes: la Banda Gaites Villaviciosa-El Gaitero y les llocales Banda Gaites Candás y la so banda d’escolinos. Completen el cartel la ganadora del campeonatu bretón, Bagad Roñsed-Mor de la población de Lokoal-Mendon; la conocida Banda Gaitas A Carballeira, de Galicia; y l’Agrupación Sacaires de Tarragona, que va poner el toque diferente al Festival. “Nós siempre tratamos de trayer les meyores bandes posibles. L’oxetivu ye meyorar el nivel añu tres añu”, destaca Fernández Rancaño, que pon al Villa de Candás al mesmu nivel que’l Festival de la Sardina. “Son les dos cites del branu candasín”, esplica.

 

El programa del Festival va principiar el vienres, 22 de xunetu, con un pasucais a les 19.30 hores, pa depués cellebrar la Nueche de Gaites a partir de les 23 hores. Pal sábadu, l’actividá va comenzar a les 13.30 hores con un pasucais que va repetise a les 19.30 hores y, yá de nueche, a les 23 hores, va celebrase’l momentu más esperáu: el Festival nel Parque Les Conserveres. Les persones que quieren vivir esti eventu nun sitiu privilexáu nes primeres files pueden facese socios del Villa de Candás pagando 10 euros, una cantidá que tamién inclúi una camiseta de baldre.