El Farho Xixón Baloncestu ruempe la racha de derrotes ganando en Tarragona

El Farho Xixón Baloncestu ganó por ún puntu, 82-83, al C. B. Tarragona, un equipu que nun perdía na so casa dende`l 3 de payares col Fuenlabrada. De primeres el partíu tenía unes perspectives perdifíciles. Dempués de cuatro derrotes seguíes, una selmana de mancadures -foi baxa Chus Poves y Waleskowski taba tocáu- y de trés meses ensin cobrar no estradeportivo, l´equipu xixonés dominó dende la primera canasta de Saúl Blanco.

Los asturianos marcaron les diferencies nel primer cuartu, llogrando una ventaya d´ocho puntos, que caltuvo cuasi tol partíu, y llegando a ganar de 14 puntos en delles fases. Namás cuando faltaben cuatro minutos pa finar el partíu, el C. B. Tarragona foi averándose, primero con un parcial de 9-0, que lu punxieron a ún puntu del Farho Xixón (67-68), anque`l llabor de Young y Pacreu lléváronlu a caltener diferencies d´hasta 6 puntos (71-76) y entrar nel últimu minutu con cuatro puntos pal equipu asturianu, foi entós cuando`l trabayu de lker Urreztzi llevó al equipu catalán a tar a ún puntu, faltando 30 segundos, pero Vallmajó con cuatro tiros llibres trasformaos, de dos personales que-y ficieren nesos caberos segundos, llevó a los xixoneses a la victoria.


El primer cuartu foi onde`l Farho Xixón Baloncestu llogró, na última xugada del mesmu, una ventaya d´ocho puntos (16-24), dempués d´un balón robáu por Xavi Vallmajó a Pau del Tío. Nesta fastera los xixoneses llograron 12 canastes de 16 intentos, dimientres el Tarragona tuvo un parcial de cero de trés en triples. Amás nel primer minutu de xuegu mancóse-y Owens. Nesti periodu Young y Pacreu metieron seis puntos y Fuller ocho.


Nel segundu y tercer cuartos la igualdá foi l´elementu más destacáu con empates a 13 y a 24 puntos. Nel segundu cuartu volvió a xugar Owens, que metió la so primera canasta cuando diben 5´30´´. El Farho Xixón llegó a tener una másima diferencia de 10 puntos en delles fases del alcuentru. El cuartu foi mui floxu d´anotación y los dos equipos fallaron muncho nel tiru, finando con un 29-37.
Nel tercer cuartu entamó col Tarragona poniéndose a 4 puntos, pero un triple de Vallmajó punxo una separtación de 9 (33-42), llegando a ser ésta de 14 puntos (38-52) a 5 minutos del final del cuartu, gracies a la so superioridá asturiana nel rebote y a lo ceo de los sos contraataques. Anque con Schutte na pista`l C. B. Tarragona llogró ponese primero a 11 y dempués a 8 al final del cuartu, con un 53-61.


Nel caberu periodu`l Farho Xixón ganaba de 10 puntos (58-68), faltando seis minutos y mediu, y foi cuando`l Tarragona con un parcial de 9-0 púnxose a un puntu (67-68). El Farho Xixón supo mantenese per delantre nel marcador con pequeñes diferencies y saber xugar los últimos minutos y ganar el partíu, a la escontra de los cuatro últimos nos que perdió nos segundos caberos.
Nel Farho Xixón rellumó`l gran partíu de Tim Young, que foi`l meyor xugador del alcuentru (22 puntos, con 8 de 10 en tiros de dos y un 80% d´aciertu; 7 rebotes; 2 asistencies; 1 tapón; 6 faltes personales recibíes; 33 puntos de valoración), tamién el gran llabor de Keith Waleskowski (15 puntos, 12 rebotes, 1 tapón y 1 mate). Otros xugadores destacaos nel equipu asturianu foron Jordi Vallmajó (15 puntos, 3 rebotes y 4 asistencies) y Josep Pacreu (18 puntos, 4 rebotes, 7 personales recibíes). Nel C. B. Tarragona destacar a Iker Urreitzti, que dempués d´un entamu mui floxu foi`l que metió al so equipu nel partíu, (18 puntos, 3 asistencies y 4 bolones robaos); Todd Fuller qu´entamó bien el partíu, anque dempués foi desapaeciendo (13 puntos y 2 rebotes); Roger Fornas (9 puntos, 6 rebotes y 3 asistencies) y Jordi Grimau (10 puntos y 3 rebotes)

Alliniaciones:

C. B. Tarragona: Iker Urreitzti (18), Berni Álvarez (4), Alejandro Alba (2), Roger Fornas (9) y Trelonnie Owens (10). Tamién xugaron: Pau del Tío (5), Todd Fuller (13), Anderson Schutte (11) y Jordi Grimau (10).


Farho Xixón Baloncestu: Jordi Vallmajó (15), Josep Pacreu (18), Saúl Blanco (5), Keith Waleskowski (15) y Tim Young (22). Tamién xugaron: Antxon Iturbe (2), Rubén Suárez (2) y Jorge Lledó (4).

Árbitrios: Miguel Ángel Garmendia y Victor Uroz. Eliminaos por cinco faltes personales, nel C. B. Tarragona, Pau del Tio (minutu 40) y, nel Farho Xixón Baloncestu, Josep Pacreu (minutu 40). Unes 1300 persones nel Pavelló Municipal El Serrallo de Tarragona.
Parciales per cuartos: 16-24, 13-13, 24-24 y 29-22.