El Farho Xixón Baloncestu pierde nun partíu mui igualáu

Nun partíu mui igualáu`l Farho Xixón Baloncestu salió derrotáu del Pazo dos Deportes Paco Paz pol resultáu de 80-76, favoratible al equipu del Ourense.

L´equipu xixonés nun foi a llograr la tercera victoria siguía, que nun algama dende hai dos temporaes, y asina poner más tierra pel medio colos equipos que vienen tres dél, amás de nun cuntar nuevamente col so capitán, Antxon Iturbe, que sigue mancáu. Ún de los aspeutos a destacar y perimportante na derrota foi les perdes de balón del Farho Xixón que foron 27, por 16 del equipu ourensán.
El primer cuartu ganólu equipu xixonés por cuatro puntos , 14-18, y dientro de la igualdá que tuvo tol alcuentru llegóse al descansu con una mínima diferencia favoratible al Ourense de dos puntos, 33-31.

Nel tercer cuartu`l Farho Xixón volvió a ponese per delantre con tres puntos y ganólu con un 55-58. Asina llegóse al caberu cuartu con igualdá nel marcador, como pasare a lo llargo de tol partíu, pero l´Ourense supo xugar meyor l´últimu minutu. Cuando faltaben trenta segundos pa finar, Xavi Vallmajó falló un triple con un marcador de 74-73. Dempués los dos equipos dedicáronse a facer faltes personales, llogrando l´equipu gallegu seis puntos nos tiros de les mesmes.


Nel equipu local el meyor foi Ricky Wrigth (con 20 puntos y 11 rebotes). Tamién destacó la direición del base Juanjo Bernabé (con 18 puntos) y Zakee Wadood ( con 10 puntos).
Nel Farho Xixón el meyor foi Tim Young (con 7 puntos y 11 rebotes, 10 d´ellos defensivos). Tamién hai de señalar el llabor de Josep Pacreu (con 12 puntos , 4 rebotes y 4 asistencies) y Chus Poves (con 11 puntos, 4 rebotes y 3 triples de 6 intentos), anque`l másimu anotador foi Xavi Vallmajó con 13 puntos.

Alliniaciones:

Club Ourense Baloncesto: Juanjo Bernabé (18), Zakee Wadood (10), Sony Vázquez (7), Ricky Wrigth (20) yWillie Earl Ladson (6). Tamién xugaron: Antonio Bustamante (3), Juan Blanco (3), Rubén Vila (2), Juan Sanguino (9) y Óscar García (2).

Farho Xixón Baloncestu: Xavi Vallmajó (13), Chus Poves (11), Josep Pacreu (12), Keith Waleskowski (10) y Tim Young (7). Tamién xugaron: Josep Ortega (3), Jorge Lledó (4), Saúl Blanco (8) y Rubén Suárez (8).


Los árbitrios del partíu foron los señores Miguel Ángel Pastrana y David Guillán. Eliminaos por cinco personales Zakee Wadood y Sony Vázquez del C. Ourense Baloncesto. El Farho Xixón Baloncestu nun tuvo eliminaos.
Parciales per cuartos: 14-18, 19-13, 22-27 y 25-18. Tuvieron presentes 1.500 persones nel Pazo dos Deportes Paco Paz d´Ourense.