El Farho Xixón Baloncestu, a piques de desapaecer

El Farho Xixón Baloncestu ta cuasi despaecíu dempués de que, na Xunta Xeneral Estraordinaria d´accionistes, el so Conseyu d´Alministración ficiere efectiva la so renuncia, que yá taba formalizada dende'l pasáu 23 de mayu. La grave situación económica del club xixonés, cola execución del aval depositáu na Federación, fai que nesti momentu les sos posibilidaes de supervivencia seyan mínimes, pues amás tien qu´inscribíse na Federación Española de Baloncestu enantes del martes 5 de xunetu y poner un nuevu aval de 300.000 euros. Otru fechu qu´afonda na so crisis ye que nel día de güei l´Ayuntamientu de Xixón comunicó que nun va ampliar les subvenciones al equipu xixonés.

El presidente del Conseyu d´Alministración, Félix Baragaño, señaló a los accionistes la so tristura ya incapacidá pa dar viabilidá a la sociedá. Amás indicó que la situación cambiara poco nestos caberos díes, pues les nueves cantidaes ufiertaes pola Dirección Xeneral de Deportes del Principáu, 500.000 euros en cuatro años, tán perbaxo de les necesidaes pa la continuación del club. Félix Baragaño tamién dixo que la so moral ta pelos suelos, que yá llegara al tope y que se siente inhabilitáu pa siguir. Asina comentó que l´embargu la Federación a él afectara-y personalmente en 243.301 euros.

El conseyeru Pedro Ferrer dixo na Xunta que'l "Principáu-y tomare'l pelo al Farho Xixón Baloncestu, pues nun-y diere ná nos últimos diez años al Club, yá que les perres daes pa pagar l´ascensu recuperóles per medio la Obra Social de la Caxa d´Aforros d´Asturies".

Asistieron a la Xunta unos trenta accionistes representando al 5,47% del capital social y nel so orde del día había cinco puntos ente ellos, amás de la renuncia de los conseyeros, otru de nombramientu de nuevos conseyeros y namás el Presidente de la Federación de Peñes, José Valentín Suárez, s'ufiertó pa esi cargu cola condición de que'l Conseyu nun dimitiere, anque nun se nombraron nuevos conseyeros al nun aceptase esa condición de siguir.

Dende'l primer momentu la Xunta, suscitóse un alderique na que dellos accionistes pidieron al Presidente y a los conseyeros que nun dimiteran, que siguieran, aaptándose a la realidá económica que tuvieren y que si l´equipu descendía de categoría nadie diba reprocha-yos ná. Nesi alderique tamién se faló de la posibilidá de vender la plaza na Lliga LEB1, que yera otru puntu l´orde del día, pero'l Conseyu señaló que nesti momentu`l valor yera mínimu al saber los equipos interesaos que'l Farho Xixón ta a puntu desapaecer y esperen garrar la plaza cuasi de baldre.

Dempués de la Xunta'l Club xixonés va a ser xestionáu por cuatro conseyeros de los siete que tien, entá nun se saba cualos, pa lliquidar la sociedá.