"El faisán montés precisa de declaración urxente como especie en peligru d’estinción"

Clemente Álvarez, miembru del grupu de trabayu sobre faisán montés de la Coordinadora Ornitolóxica d'Asturies,faló con Asturies.com sobre la situación d'una de les especies más amenazaes de la fauna asturiana y tamién una de les más identitaries. Según l'espertu de la COA, "la declaración d'especie en peligru d'estinción d'esti animal ye mprescindible pa poder entamar acciones actives de recuperación. Sicasí, y anque tolos informes científicos avalen la declaración como especie en peligru d'estinción, ésta "lleva tiempu retrasándose de manera inesplicable". Dende la Conseyería de Mediu Ambiente pidieron-yos a los grupos conservacionistes interesaos hasta'l mes de marzu de plazu pa llevar tolos trámites énte'l Ministeriu de Mediu Ambiente, pero dende la COA alvierten que nun van conceder "más retrasos nin más aplazamientos".

Y ye que tolos datos que se tienen sobre l'estáu actual del faisán montés pinten mal enforma. Según esplica Clemente Álvarez, el modelu d'estinción d'una especie ta cumpliéndose pol llibru nel casu del faisán o gallu montés. Esti modelu implica qu''hai trés pasos nel procesu. El primeru consiste na mengua de la población pelos bordes de la zona qu'ocupa la especie, qu'empieza a menguar "igual qu'un cachu de xelu cuando se saca de la nevera. Clemente esplica qu'esto yá pasó a lo llargo de los últimos años, en que "la especie estinguióse dafechu en Palencia, Lleón y Galicia, desapaeciendo según los últimos datos, los pocos animales que quedaben na comunidá de Cantabria". En segundu llugar, el modelu d'estinción diz qu'el "nucleu duru" de la especie france en dellos grupos. Clemente Álvarez diz qu'esto ta pasando claramente n'Asturies "dende l'añu pasáu, en que'l censu demostró que la población taba rota espacialmente en dos grupos ensin comunicación ente ellos". Clemente aporta nesti sentíu una novedá importante, y ye que "según los datos del últimu censu pue falase yá de trés grupos poblacionales en cuenta de dos. El primeru, y el que meyores posibilidaes de supervivencia tien, ye l'occidental, que s'esparde per tolos conceyos del suroccidente que queden al oeste de Somiedu. El segundu, y el que peor traza tien de poder salir alantre, ye'l que s'asitia ente los conceyos d'Ayer y Casu. Un tercer noyu poblacional ye'l que se correspuende col Parque de Redes, espurriéndose pel oriente hasta Ponga". Clemente Álvarez esplica qu'agora mesmo l'esquema d'estinción del faisán montés" ta nesa segunda fase en que los grupos de población ruempen n'otros más pequeños".

Ente les causes que tan llevando al desanicie de la especie, Clemente apunta pa la xuba de la población de venáu, una especie que llegó a tar estinguida dafechu n'asturies y qu'anguaño presenta unes cifres mui altes de población. El venáu compite diréctamente col faisán pol arándanu, frutu del que s'alimenten dambes especies y que cada vegada ye más difícil d'atopar. Ello ye que, nos llugares onde compiten por esti recursu, el venáu ye a espulsar al faisán, faciendo más difícil la supervivencia d'una especie que quedare dañada gravemente pol efectu de la caza. Clemente Álvarez recuerda que "hasta los años 70 el faisán montés cazóse llegalmente por millares y que d'entós p'acá siguió cazándose illegalmente, dexando la población en mínimos".

Con too ello, n'Asturies cúmplense agora col casu del faisán montés les dos primeres fases que manda la plantiya d'estinción d'una especie. Tres d'estes dos fases, vien una tercera y definitiva: l'atomización de los grupos y el desanicie definitivu de la especie al dir morriendo los animales, que van quedando ensin posibilidá de crear relevu xeneracional nengún. Marzu pue ser un mes decisivu pa torgar esti procesu en casu de salir alantre la declaración como especie en peligru d'estinción