El deséu d'una Fiesta de la Oficialidá de Bimenes con oficialidá nel país

|
XXV Fiesta de la Oficialidá Bimenes

Los participantes naguaron por nun tener que reivindicala na ventésimu sesta edición.

El sábadu Bimenes celebró la XXV Fiesta de la Oficialidá, el festexu col que se recuerda la declaración d'oficialidá nel conceyu del 5 de xunetu del 1997 baxo’l mandatu de Joaquín ‘Xuacu’ García Gutiérrez, torgada un añu depués pol TSXA al entender que l'Ayuntamientu nun tenía competencia pa ello. Años depués, nes mesmes feches del 2016, l'actual alcalde Aitor García Corte algamaba'l sofitu de tol Plenu pa volver a declarala.

La situación sanitaria actual limitó l'habitual actividá festival venceyada a esta xornada, con una importante xinta popular como exa, polo que'l Conceyu decidió reducila a un actu institucional pela mañana y a un conciertu pela tarde. Nel Palaciu del Marqués de Casa Estrada, en Martimporra, tuvieron presentes Artur Nunes, alcalde de Miranda de l Douro, territoriu hermanáu con Bimenes onde'l mirandés, pertenciente al tueru asturlleonés, ye oficial; y Antón García, direutor xeneral de Política Llingüística.

El portugués recibió nel actu, de manes de García Corte, les llaves del conceyu. Mentes, el de Tuña, al igual que'l primer edil yerbatu, deseó que la del sábadu fora la última Fiesta de la Oficialidá con reivindicación d'oficialidá p'Asturies, voluntá na que tolos presentes coincidieron.

Con música

Una actuación de Los Yerbatos siguió a les intervenciones de los representantes institucionales. Yá de tarde, ufrieron un conciertu nel mesmu llugar les bandes Los Gascones y Figos de Tuna.

Na semeya, momentu de la intervención de García Corte, con Nunes y Antón García a la so izquierda.

 

Contador Estadistiques