El derbi carbayón tuvo 16.500 espectadores

16573 espectadores pa un partíu de tercera. Esti númberu de récord, propiu de partíos de primera división, foi el que rexistró esti domingu'l derbi ente los dos equipos de la capital, el Real Uviéu y l'Uviéu Astur CF. Anque tol mundu daba al Real por favoritu, el resultáu final d'empate a 2 foi lo de menos, y lo que quedó pal álbum de semeyes foi el ver la marcha pacífica de 5.000 aficionaos camín del Tartiere y l'aspectu del estadiu, anque una avalancha humana pa celebrar el gol de Cervero pudo emporcar la folixa. L'afición del Real, muncho más numberosa, llevó pancartes contra los xugadores del Uviéu que se pasaron al enemigu Astur.

La mañana del domingu, lo mesmo n'Uviéu que en pueblos asturianos de tradición azul, la entruga "y tu, ¿de qu'Uviéu yes?" yera l'entamu a toles conversaciones sobre'l partíu. Sicasí, l'afición parez que se marca mayoritariamente pola opción histórica del Real Uviéu, superando una resquiebra con tresfondu políticu -l'Uviéu ACF ye "l'equipu del alcalde"- El día enantes del partíu, el Real Uviéu dio anuncia de que tenía 10.700 abonaos, cantidá impensable pa la categoría. La media d'asistencia al Tartiere pa ver al Real ye de 7.000 espectadores, y l'equipu cuenta con cerca de 1.000 seguidores en cada desplazamientu.

En comparanza colos demás partíos de la xornada, el Uviéu-Uviéu del domingu tuvo más públicu que tolos demás partíos de tercera, segunda B, segunda y hasta quedó enriba d'otros trés partíos de la másima categoría. El fenómenu d'asistencia de públicu salió en tola prensa estatal, y asina lo retrataron del Diario de León, Diario de Córdoba Periódico Mediterráneo la canal de deportes de Terra o el Adelanto de Salamanca.

Depués del derbi, los dos equipos siguen no alto de la tabla. El Real Uviéu, líder invictu depués de partir con seyes puntos de desventaya por castigu federativu, dio anuncia del fichaxe del delanteru de 22 años Darío Aliaga, que vien del Hércules procedente de la canera del Valencia pa reforzar la delantera azul. El Real Uviéu tamién presentó'l vienres al so primer patrocinador non-institucional, la marca de bicicletes Orbea, que apaez dende esti domingu nos pantalones azules