El derbi asturianu foi d'altura nesta ocasión

Un tiru de Nacho Méndez a la escuadra nel minutu 1 tiñó de roxiblancu'l duelu de rivalidá más vistosu n'años. L'Uviéu, que fixo un bon partíu magar la derrota, reclamó dos penaltis.

Xixoneses y uvieínos ufrieron un bon espectáculu n'El Molinón ente 26.794 espectadores, con munchos siguidores azules na grada, tanto repartíos pel campu como na zona visitante, onde vieron partíu 1.150 aficionaos. El derbi llevantara muncha espectación dau'l bon nivel de xuegu que vienen amosando los dos equipos esta temporada y finalmente nun defraudó.

Tuvo que remar contra corriente l'Uviéu por mor del tempraneru gol de Nacho Méndez, un espectacular trallazu a la escuadra al recoyer un balón na frontal del área. Imparable.

Quitáu'l dominiu de los primeros minutos del Sporting, los de Carrión foron tomando'l control de balón, de menos a más. Tuvo Paulino una ocasión mui clara, pero nun foi quien a rematar, y el partíu llegó con 1-0 al descansu.

La polémica

L'Uviéu foi más dominador na segunda metá frente a un equipu llocal cómodu defendiendo. Nun tuvo trabayu Christian Joel, namái nun llanzamientu de falta de Colombatto, pero sí l'árbitru, con dos posibles penalties nel área roxiblanca.

El primeru llega con una falta de Pablo García sobre Moyano, cola dulda de si foi dientro o fuera del área. El vascu Jon Ander González Esteban señalólu fuera y dende la sala VOR, col madrilanu David Gálvez Rascón al frente, nun corrixeron la decisión.

Sí pidió que fora al VAR a ver un toque de Varane a Paulino a falta de 9 minutos para el final, pero'l vascu consideró que nun tuvo la intensidá necesaria pa señalar la pena máxima y nun modificó la so primer decisión. Nel sestu minutu del añadíu (dio 7), Mario González pudo marcar a puerta vacía dende unos 35 metros depués d'un corner al que xubió a rematar el meta visitante, pero incomprensiblemente disparó fuera.

Al final victoria pal Sporting nun derbi cinco años depués, trés puntos que coloquen a los de Ramírez en cuarta posición con 42, a 3 del ascensu direuto, que marca l'Eibar, anque'l Valladolid, rival del sábadu n'El Molinón (18.30 hores; Movistar+ y LaLiga TV HypermotionV), podría pasar a los xixoneses si empata o gana esta nueche al Albacete en Zorrilla. Mentes, l'Uviéu queda en décimu puestu con 38, a 2 de los puestos de promoción, pero dexa bones sensaciones magar la derrota.

Na semeya, el Coro Minero de Turón y la Banda de Gaitas Villa de Xixón interpretaron l'himnu del país en comuña colos aficionaos.