El Crossroad, un ésitu con visión de futuru

N'Asturies.com falamos con Kike "Louie". Esti salmantinu propietariu del "Louie bar" ún de los más modernos chigres musicales de la nueche de Xixón ye tamién ún de los promotores musicales más activos de la ciudad. Elli tuvo tres de la visita a Xixón de xente como Arthur Lee col so grupu "Love" y ye tamién l'alma qu'organiza'l festival de rock "Crossroad". Una selmana dempués d'apagase los focos de la plaza de toros de Xixón, onde más de 4.000 persones asistieron al "Crossroad 04" Kike danos la so valoración de la edición d'anguaño y de les perspectives de futuru d'esti certame.

Dende la organización del festival nun dulden en dicir que too salió "mui bien, casi se consiguió cuadruplicar el númberu de persones que vinieron al festival con respecto a la edición del añu pasáu, colo que tamos mui satisfechos col resultáu". Kike quier amás destacar "el bon ambiente qu'hubo con un públicu entregáu, rescamplando'l comportamientu escelente de la xente a lo llargo de los dos díes qu'ayudó a que nun hubiere nengún problema". No que cinca a l'actuación estelar del Crossroad, los "Stray Cats", Kike Louie nun tien más que dicir que "son una banda escepcional, tanto dientro del escenariu como fuera".

Dempués d'asitiáse como un festival rockeru de referencia en namás dos años, agora queda saber cuál ye'l futuru d'esti eventu. Nesti sen Kike apunta que "esti ye un festival únicu n'Europa, una especie de Benicasim rockeru" pero "queremos siguir faciendo un festival asequible que nun se nos vaya de les manes". Pa poder asegurar el futuru d'esti festival, y pa qu'esti futuru tenga d'escenariu la ciudá de Xixón, Kike comenta que "Xixón y la plaza toros abúltennos espacios afayadizos pa desenvolver el festival, pero agora llega'l momentu de sentáse a negociar col Conceyu p'algamar que la institución s'implique más nesti festival".

Más de 4.000 persones asistieron esti añu a los dos díes de conciertos, siendo más del 50% del públicu xente de fuera d'Asturies que vieno en peregrinación rockera pa pasar un fin de selmana nel que dexaron un bon gastu nos hoteles, restoranes y chigres de la ciudá, datos que dicen muncho a la hora de pidir un mayor sofitu institucional. La primera intención del Crossroad ye la de quedar en Xixón, pero va depender del resultáu de les negociaciones que tenga la organización col Conceyu si l'añu qu'entra volveremos a tener Crossroad na Villa de Xovellanos.