El Conseyu Políticu d’Izquierda Xunida aprobó los alcuerdos electorales col Bloque por Asturies y Los Verdes

El Conseyu Políticu d'Izquierda Xunida, qu'aconceyó ayeri n'Uviéu, decidió aprobar les coaliciones electorales colos partíos Bloque por Asturies y Los Verdes. Les coaliciones, que se votaron por separao, rexistraron un 73,95% de votos a favor nel casu del Bloque y un 74,2% nel casu de Los Verdes. Según s'apunta dende IX, l'oxetivu d'estos alcuerdos va ser el de poder presentase nes elecciones del 27 de mayu como "una única candidatura que represente un proyectu políticu claramente d'izquierdes y alternativu".

El Conseyu Políticu d'Izquierda Xunida d'Asturies aprobó tamién por una mayoría del 87,5% el documentu "Pa una Asturies Social, pa un mayor autogobiernu" una ponencia política qu'afita qu'zquierda Xunida va reivindicar un Estatutu d'Autonomía nuevu p'Asturies que reconoza la oficialidá de la llingua y que-y dea a Asturies el mesmu nivel d'autogobiernu qu'otres Comunidaes nel marcu d'un modelu d'Estáu Federal.

El documentu - ponencia aprobáu ayeri fala del "triple retu" al que s'enfrenta Asturies, que pasaría por garantizar un modelu de desarrollu sostenible pero que garantice una actividá económica y industrial. El segundu retu sedría'l de garantizar un modelu social avanzáu "que dea rempuesta a los retos d'una sociedá avieyada, que frene la emigración xuvenil y ofreza los instrumentos públicos para redistribuir la riqueza". El tercer retu asturianu sedría l'avance nel autogobiernu na identidá omo pueblu nel marcu d'un Estáu Federal Republicanu.

Izquierda Xunida quier que l'Estatutu d'Autonomía reconoza tamién derechos individuales como'l de la educación incluyendo la superior, la protección de la salú, el derechu al salariu social y demás prestaciones sociales básiques y l'accesu a la vivienda.

El documentu espeya tamién l'esmolecimientu d'IX pola especulación urbanística y pide que se garantice un modelu nuevu de xestión de los recursos hidráulicos, neto que llevar alantre una política sostenible na xestión de residuos opuesta a la incineración. IX va defender nel terrén económicu que los Estatutos de les comunidaes nun apauten unilateralmente criterios sobre financiación qu'afecten a tol conxuntu del estáu.