El Conseyu de la Mocedá denuncia la precariedá llaboral de los becarios

El Conseyu de la Mocedá del Principáu d'Asturies (CMPA) dio ayeri una rueda de prensa na qu'aportó datos sobre la situación de los becarios y reclamó un nuevu estatutu llegal pa esti colectivu.

"Si se quier tener programes eficaces d'Investigación y Desarrollu primero ye preciso desaniciar la precariedá" Con estes palabres espresó la presidenta del CMPA Rebeca Rodríguez la voluntá del organismu que representa d'acabar cola situación de los becarios n'Asturies y nel conxuntu del estáu. Pa la presidenta del CMPA "Los obreros del conocimientu son trabayadores ensin derechos sociales nin llaborales, ensin papeles".

Amás de cobrar menos por facer el mesmu trabayu, Rebeca Rodríguez esplicó que los becarios carecen de Seguridá Social, dándose casos en que nun tienen derechu a baxa por enfermedá, mancadures y accidentes o maternidá,ello arriendes de nun tener prestaciones por desemplegu nin cotizar pa la pensión por desarrollar un llabor equivalente al de cualquier persona con contratu. Pa más aquello, los becarios tienen la obligación de declarar nel IRPF lo que cobren pola beca como "rindimientos de trabayu" anque llegalmente nun sían trabayadores.

Contra esta realidá que se da nel casu español, Rebeca Rodríguez esplicó que la situación ye mui heteroxénea n'Europa pero en cualquier casu "los países que más invierten en ciencia son los que reconocen como trabayadores a los investigadores" dándose la circunstancia de qu'estaos de la UE como Portugal, Eslovenia o Hungría , con indicadores más menguaos de desarrollu tecnolóxicu qu'España, dan-yos meyor protección social a los sos investigadores, mientres qu'equí un tantu por cientu mui grande de los llabores d'investigación tan en manes de personal investigador en formación, categoría na que s'enxerten indiscriminadamente estudiantes de doctoráu, becarios d'investigación y otres figuras ensin aclariar".

Estes condiciones de trabayu dexeneren nun altu porcentaxe de fuga de celebros contra'l que delles universidaes y autonomíes del estáu yá tan dando pasos. Asina, la Complutense de Madrid reconoz la naturaleza llaboral de l'actividá investigadora al traviés de la Carta de derechos y deberes del Personal Investigador en Formación na UCM, mientres que los gobiernos autonómicos de Cataluña, Aragón, Castiella La Mancha o Extremadura yá tienen aprebaos los que se conocen como "programes 2+2" qu'ufierten dos años de beca y dos años de contratu al beneficiariu garantizándo-y una entrada al mercáu llaboral y reconociéndo-y unos derechos.

Pela so parte, el Gobiernu asturianu nun ta moviendo ficha nesti asuntu, según esplicó Rebeca Rodríguez. Asina, anque la Xunta Xeneral del Principáu aprebó nel 2001 una Resolución sobre Beques Predoctorales y Posdoctorales de Formación de Personal Investigador na qu'afalaba a una mayor protección d'esti colectivu, el Conseyu de Gobiernu sigue ensin facer efectives midíes qu'igualen los derechos de los becarios. Ente estes midíes, según la presidenta del CMPA pasaríen pola desapaición del sistema actual de beques creando una figura llaboral nueva que tendría de llamase "Personal Investigador en Formación (PIF), una figura aasemeyada a la de los MIR sanitarios y que na que l'investigador tendría una rellación contractual cola institución na que trabayare, dexando de ser un "becariu". D'otra manera, el CMPA fai un llamáu tamién al Parlamentu Asturianu pa que-y reclame al Congresu l'aprobación d'un marcu xurídicu únicu pa tol estáu en materia d'investigación.