El Conseyu de la Mocedá apunta a les rellaciones familiares como un factor principal nel retrasu de la emancipación

El presidente del Conseyu de la Mocedá, Paulino Feito, presentó güei'l 'Informe sobre la mocedá urbano n'Asturies', según el cual, les relaciones familiares figuren como ún de los principales condicionantes de los mozos asturaianos a la hora d'emancipase y abandonar el nucleu familiar.

En rueda prensa, Feito destacó que l'oxetivu persiguíu por este informe yera dotar d'un "sesgu cultural", a les causes del retrasu de la emancipación de la mocedá del Principáu.

Pal sociólogu y coautor d'esti estudiu Enrique Alonso, l'ausencia o la tardanza na emancipación nun sólo tien que ver colos factores economicistes, sinón que les construcciones morales y los valores culturales aprendíos xueguen un rol importante.

"Los condicionantes económicos nun son suficientes pa esplicar la emancipación, hai amás un contestu cultural", afirmó Alonso. Según el sociólogu, los proxenitores tampoco apoyen la emancipación de los sos fíos hasta qu'éstos algamaren la llamada "triada seguritaria". Ye dicir, la seguridá afectiva, económica y residencial. "L'oxetivu de los proxenitores ye que los fíos s'emancipen cuando algamen esa triada", afirmó l'espertu.

Según Enrique Alonso, una vez materializada la emancipación, la mocedá urbana asturiana nun pierde'l contactu cola so familia, sinón que se fai un modelu de "familia estensa flexible".

Esti modelu caracterízase pola ayuda mutua ente proxenitores y descendientes y la cercanía residencial. "Los mozos valoren muncho vivir cerca de la residencia de los sos pas", declaró l'espertu.

Anque los condicionantes culturales presenten un pesu imporante na decisión de la mocedá d'emancipase, les esplicaciones más estendíes pa esplicar esti fenómenu son de carácter economicista. Los mozos del Principáu vincule la emancipoación col mercúa de trabayu y el de la vivienda. "El mercáu de trabayu diba tener de cambiar p'algamar mayores niveles d'emancipación", destacó'l sociólogu.

El 'Informe de la mocedá urbano n'Asturies' ellaboróse ente los meses d'abril y payares del presente añu, y contó con un total de 111 informantes, muyeres y homes, distribuyíos n'edaes de 20 a 27 años y de 28 a 34. Los informantes seleccionaos procedíen na so totalidá de les tres ciudaes de la rexón, Uviéu, Xixón y Avilés.