El Conseyu de Gobiernu apreba les ayudes a los centros pal 2005

El Conseyu de Gobiernu del Principáu d'Asturies d'ayeri xueves autorizó un gastu con destín a la convocatoria pública de subvenciones al favor de les Comunidaes Asturianes nel Esterior por un importe de 775.000 euros (129 millones de les antigües pesetes). Esta cantidá supón una xuba del 35 % respective a les ayudes que se dieron nel exerciciu 2.003, añu en que tamién hebo una xuba curiosa d'estes ayudes.

D'otra manera, como yá s'esplicare nel momentu de la presentación del Plan de la Emigración nel que van enxertes estes ayudes, la convocatoria va adelantase a primeros del añu 2005 n'atención a la demanda de munchos centros asturianos que teníen qu'adelantar perres, o hasta empufándose en créditos mientres esperaben poles ayudes del Principáu. La convocatoria tamién enancha'l plazu de solicitú y fai más cenciellu'l procesu alministrativu pa tramitales. El destín d'estes ayudes ye mayoritariamente'l financiar meyores nes instalaciones de los centros asturianos y les sos actividaes culturales.

Según sorraya la declaración del Conseyu de Gobiernu "Los asturianos emigrantes caracterizáronse siempres pola so organización y calter emprendedor, creando sociedaes al traviés de les que se vertebraben y sofitaben ente ellos nel esterior". El Conseyu de Gobiernu empondera que la esistencia d'estes comunidaes asturianes nel esterior, dende va munchos años, benefició la promoción d'Asturies y contribuyó al arriquecimientu de la cultura asturiana, siendo anguaño un importante capital social p'Asturies